As Muhanga yasabye Ferwafa gukurikiza amategeko ikazamuka mu cyiciro cya mbere

Yanditswe na Admin ku wa 01.08.2017 saa 18:00 | Yasuwe : 23

Ubuyobozi bw’ikipe ya AS Muhanga butangaza ko biteguye kuzamuka mu cyiciro cya mbere muri uyu mwaka w’imikino igihe hakurikizwa amategeko, maze bagasimbura ikipe y’Isonga FC yamaze gusezera.

Isonga FC yari yabonye amahirwe yo kuzamuka mu cyiciro cya mbere isezereye AS Muhanga muri 1/2, yamaze kwandika isezera mbere y’uko umwaka w’imikino utangira.

Kugeza magingo aya, igikomeje kugarukwaho na benshi ni ikipe ishobora gusimbura Isonga FC mu cyiciro cya mbere, aho bamwe bavuga ikipe ya Kiyovu Sports abandi bakavuga ko itegeko riha amahirwe menshi ikipe ya AS Muhanga.Ikipe ya Kiyovu Sports yo yamaze gutangira imyitozo hamwe n’umutoza mushya Cassa Mbugo, aho yiteguye umwaka utaha w’imikino.

Aganira n’itangazamakuru kuri uyu wa gatatu ,umuyobozi wungirije w’ikipe ya AS Muhanga  Severin Ntivuguruzwa yatangaje ko iyi kipe yiteguye kuzamuka mu cyiciro cya mbere igihe haba hakurikijwe amategeko. Yagize ati : ” Shampiyona ishize yadusize mu cyiciro cya kabiri, ariko niba Isonga yasezeye, twe twiteguye gukina mu cyiciro cya mbere.Abakinnyi hafi ya bose barahari.Twatakaje umukinnyi umwe gusa ’Jules Moise’ wagiye muri Rayon Sports, kandi kumusimbuza ntabwo ari ibintu bigoranye.Ubu twakinishiga abakinnyi batarengeje imyaka 21, ariko tugiye mu cyiciro cya mbere twashyiramo n’abakuze ndetse twaba twemerewe no kugura abakinnyi bavuye hanze. Ubushobozi ntabwo ari ikibazo gikomeye.”.

Uyu muyobozi yakomeje avuga  ko ubu AS Muhanga bari kwandika ibaruwa ijya muri FERWAFA, isaba ko niba Isonga FC yarasezeye [dore ko nk’abanyamuryango batarabimenyeshwa] hakurikizwa amategeko AS Muhanga ikazamuka mu cyiciro cya mbere. Ati : ” Ntabwo turabimenyeshwa na FERWAFA ko Isonga yasezeye. Ejo hari inama izanagaruka kuri iki kibazo, ubu turi kwandikira FERWAFA dusaba ko bazakurikiza ingingo ya 10 y’amategeko y’icyiciro cya mbere n’icya kabiri yemejwe n’abanyamaryango ubundi tugakina icyiciro cya mbere.”

Tanga igitekerezo na Facebook

Tanga igitekerezo