AS Kigali mu nzira zo kwegukana Sibomana Patrick

Yanditswe na Rwanda Football ku wa 04.02.2019 saa 12:31

AS Kigali yaba yamaze kumvikana n’umukinnyi ukina ku ruhande rw’ibumoso asatira, Sibomana Patrick  bita Pappy  kuyisinyira amasezerano y’amezi atandatu.

Ikipe ya AS Kigali ishobora gutakaza abakinnyi bayo babiri bakina basatira; Jimmy Kibengo Mbaraga werekeje mu gihugu cya Vietnam na Emmanuel Ngama, bivugwa ko yifuzwa n’amakipe yo mu cyiciro cya kabiri mu Bwongereza arimo na Hull City.Mu rwego rwo kubasimbuza, ubuyobozi bwa AS Kigali, buhagarariwe n’umunyamabanga wayo Komezusenge Daniel bwatangiye ibiganiro n’abakinnyi batandukanye barimo na Sibomana Patrick Pappy.

Uyu mukinnyi wavutse tariki 15 Ukwakira 1996 aherutse gutandukana na Shakhtyor Soligorsk yo mu cyiciro cya mbere muri Belarus, yakiniye umwaka umwe muri itatu yari yarayisinyiye kubera ibibazo by’irondaruhu.

Sibomana Patrick

Umunyamabanga wa AS Kigali Komezusenge Daniel, yemereye ikinyamakuru Igihe ko ibiganiro na Pappy byarangiye igisigaye ari ukubona ibyangombwa bimwemerera gukina. Yagize ati “Pappy twaraganiriye ariko hajemo ikibazo cyo kubona ibyangombwa kuko isoko ryo kugura abakinnyi mpuzamahanga ryarafunze. Turi gushaka icyakorwa ngo adukinire ariko bidakunze twaganira akazatangira kudukinira muri Kamena ubwo isoko rizaba ryongeye gufungura.”

Biravugwa ko uyu mukinnyi yemeye gusinya amasezerano y’amezi atandatu agahabwa miliyoni eshatu z’amafaranga y’u Rwanda, akajya ahembwa ibihumbi 400 Frw ku kwezi.

Isoko ryo kwinjiza abakinnyi mu Rwanda bavuye hanze ryafunzwe tariki 17 Ukuboza 2018, ubu bikaba bidashoboka ko Sibomana ajya muri AS Kigali, bivugwa ko ashobora gusinyishwa n’ikipe yo mu cyiciro cya kabiri kuko zo zidakoresha uburyo bw’ikoranabuhanga rya FIFA ryo guhererekanya abakinnyi , akaba yahita atizwa muri AS Kigali. Ibi bigomba gukorwa bitarenze ku cyumweru tariki 10 Gashyantare 2019 kuko aribwo isoko ryo kugura abakinnyi imbere mu gihugu rizafungwa.

Sibomana wari umaze iminsi akora imyitozo muri APR FC, yazamukiye mu Isonga FC ayivamo ajya muri APR FC mu 2013 yakiniye kugera 2017, ayivamo agiye i Burayi ariko ntiyahirwa none agiye kugaruka muri shampiyona y’u Rwanda.

Tanga igitekerezo