Arsenal na Chelsea nizo zizakina umukino wa nyuma wa UEFA Europa League

Yanditswe na Rwanda Football ku wa 10.05.2019 saa 08:34

Bwa mbere mu mateka amakipe ane yo mu gihugu kimwe ( mu bwongereza)  agiye guhurira ku mikino ya nyuma y’ibikombe by’iBurayi kuko nyuma ya Tottenham na Liverpool zizahurira ku mukino wa nyuma wa UEFA Champions League,Arsenal na Chelsea nazo zaraye zikatishije itike yo guhurira ku mukino wa nyuma wa UEFA Europa League.

Arsenal yabigezeho ikoreye ibirori mu mujyi wa Valencia muri Espagne aho yasanze ikipe yaho ya Valencia iyitsinda ibitego 4-2 byiyongera kuri 3-1 yari yayitsindiye mu bwongereza bituma mu mikino yombi Arsenal igera ku mukino wa nyuma itsinze ibitego 7-3 ikipe ya Valencia.

Ku ruhande rwa Chelsea na Eintracht Frankfurt ho byagoranye kuko hitabajwe penaliti kugira ngo hamenyekane ikipe igomba gusanga Arsenal i Baku muri Azerbaijan hazabera umukino wa nyuma,kuko amakipe yombi yanganyije igitego 1-1 mu mikino yombi biba ngombwa ko hitabazwa Penaliti zahiriye Chelsea yari imbere y’abakunzi bayo, kuko yatsinze 4-3.

Arsenal yabanje kwereka abakunzi bayo ibirori,yatsindiwe na Pierre Emerick Aubameyang watsinze ibitego bitatu [ku munota wa 17, 69, 89] na Lacazette watsinze ikindi ku munota wa 50.Ibitego bibiri bya Valencia byatsinzwe na Kevin Gameiro ku munota wa 11 n’uwa 58.

Ku rundi ruhande Chelsea niyo yafunguye amazamu ku munota wa 27 gitsinzwe na Ruben Loftus-Cheek cyishyurwa na Luka Jovic ku munota wa 49.Iminota 90 yarangiye ari 1-1,hashyirwaho iminota 30 y’inyongera ntihagira igihinduka byatumye hitabazwa penaliti zahiriye Chelsea yinjije 4-3.

Umukino wa nyuma hagati ya Arsenal na Chelsea uzaba kuwa 29 Gicurasi 2019 kuri stade Olympics yo mu mujyi wa Baku muri Azerbaijan.

Abateye penaliti za Chelsea : Barkley, Azpilicuta (yayihushije), Jorghino, David Luiz, Hazard.

Abateye iza FRANKFURT : Haller, Jovic, de Guzman, Hinteregger (yayihushije) Paciencia (yayihushije)

Tanga igitekerezo