APR yatwaye igikombe cy’Amahoro ,Rayon izasohoka

Yanditswe na Admin ku wa 04.07.2014 saa 19:03 | Yasuwe : 1,070

APR FC yatwaye igikombe cy’Amahoro ku nshuro ya munani ku mukino wa nyuma w’igikombe cy’Amahoro cy’umwaka wa 2014 ubwo yatsindaga Police FC 1-0.

Uyu mukino wagaragaje kutitabirwa bikabije aho utari kumenya ko ari umukino wa nyuma w’igikombe ariko ku ruhande rwa APR FC abafana bagerageje kwitabira.Nubwo ikipe yabo itakinaga, abafana ba Rayon Sports bakurikiraniraga uyu mukino hafi kuko gutsinda kwa APR FC yaricyo gisubizo rukumbi cyahaga amahirwe Gikundiro kuzasohokera u Rwanda mu mikino ya CAF Confederation Cup.

Muri uyu mukino watangise amakipe yose ubona adafungura  kubera gutinyana ariko uko binjiraga mu mukino amakipe yose yagaragaje  ishyaka buri wese ashaka kwegukana iki gikombe.

Ntibyatinze ariko umukino utangira gukomera  ubwo Emery Bayisenge wa APR FC yateraga  Coup Franc nziza ikagarurwa n’umutambiko w’izamu rya Police FC.

Police Fc nayo yahise ikanguka itangira guhanahana neza mu kibuga ariko ntirangize ku buryo igice cya mbere cyarangiye ari ubusa ku busa.

Mu ntangiriro z’igice cya kabiri,  APR FC yaje yahinduye imikinire bigaragara ko isatira cyane izamu rya Police FC yagiye ibura gato ngo yinjizwe igitego.

aprpeacecup

Ibi ntibyatinze kuko ku munota wa 61 APR FC yabonye  corner iterwa neza na Iranzi maze isanga Ndahinduka Michel (Bugesera ) ahagaze neza ahita atsinda igitego kimwe rukumbi cyabonetse muri uno mukino.

Police FC ntako itagize ngo yishyure iki gitego ndetse igenda ihusha uburyo bwinshi cyane cyane ba rutahizamu Sina Jerome na Sebanani Emmanuel waratse igitego cyari cyabazwe bitumvikana ubwo hari ku munota wa 88 hagati aho ariko ku munota wa 84 Migi yagaruye umupira n’akaboko ariko umusifuzi yemeza ko ari corner ibintu bitumvikanyweho n’abakinnyi ba Police FC ndetse n’abari baje kureba uyu mukino.

APR FC itwaye igikombe cy’Amahoro ku nshuro ya munani muri zo 6 yagitwaranye na shampiyona ; mu 2006, 2007, 2010, 2011 na 2012 na 2014.

APR FC niyo izahagararira u Rwanda mu mikino nyafurika y’amakipe yabaye aya mbere iwabo (CAF champions league) naho Rayon Sports ya kabiri muri shampiyona ikine imikino nyafurika y’amakipe yatwaye ibikombe iwabo (CAF confederation cup) kuko APR FC yatwaye ibikombe byombi.

Ni inshuro ya kabiri APR FC yambura ikipe ya Police itike yo gusohokera u Rwanda ikayihera iyindi kipe kuko mu mwaka wa 2011 yaje nanone kuyitsindira ku mukino wanyuma w’igikombe cy’Amahoro bituma Kiyovu Sports yisohokera.

Tanga igitekerezo na Facebook

Tanga igitekerezo