APR yatsinze Mukura isubirana umwanya wa mbere

Yanditswe na Rwanda Football ku wa 24.11.2014 saa 07:58 | Yasuwe : 972

Ibitego bibiri bya Patrick Sibomana na Maxime Sekamana byari bihagije kugirango APR Fc yegukane amanota atatu imbere y’ikipe ya Mukura VS mu mukino w’umunsi wa 8 wabereye kuri Sitade ya Kigali kuri iki cyumweru.

Sibomana yatsinze igitego cya mbere ku munota wa 36 nyuma yaho arekuriye ishoti rikomeye ryasize umunyezamu Alphone Nizeyimana akambakamba mu nshundura z’izamu.

Nyuma yo gutsindwa igitego cya mbere, ikipe ya Mukura yasatiriye APR ishyaka igitego cyo kwishyura ariko nibyayoroheye dore ko ba myugariro ba APR Ismael Nshutiyamagara na Emery Bayisenge babyitwayemo neza bazibira ba rutahizamu ba Mukura.

maxime

Ku munota wa 83, umusore Maxime yaje gucenga ba myugariro ba Mukura maze atsinda igitego cya kabiri, ibintu byashimishije abafana ba APR Fc.

Iyi ntsinzi ya APR Fc yatumye izamuka ku mwanya wa mbere n’amanota 20 mu mukino umunani, ikaba ikurikiwe na Rayon Sports aho iyirusha amanota atatu.

Mu yindi mikino, AS Kigali yatahanye amanota atatu nyuma yo gutsinda Musanze igitego 1-0 iwayo. Amin Muzerwa niwe watsinze igitego rukumbi cyatumye AS Kigali izamuka ku mwanya wa gatatu n’amanota 15.

I Nyamagabe, Police yanganyije na Amagaju igitego 1-1 hanyuma Etincelles nayo inganya na Sunrise igitego 1-1.

Ku Cyumweru, 23.11.2014

Amagaju 1-1 Police (Nyamagabe)

Musanze 0-1 AS Kigali (Musanze)

Etincelles 1-1 Sunrise (Umuganda)

Mukura 0-2 APR (Regional)

Tanga igitekerezo na Facebook

Tanga igitekerezo