APR yanyagiye Kiyovu igumana umwanya wa mbere

Yanditswe na Admin ku wa 25.12.2014 saa 16:15 | Yasuwe : 807

Ikipe ya APR yahaye isomo rya ruhago ikipe ya Kiyovu ubwo yayitsindaga ibitego 5-0 mu mukino w’umunsi wa 11 wa shampiyona y’icyiciri cya mbere kuri uyu wa gatatu kuri Sitade Amahoro.

Umukino watangiye ikipe ya APR isatira cyane ariko Kiyovu binyuze muri ba myugariro babo babyitwaramo neza. Igice cya mbere cyarangiye ikipe ya APR ifite igitego 1-0 gitsinzwe na Hegman Ngoma ku mupira yari ahawe na Maxime Sekamana.

Mu gice cya kabiri, ikipe ya APR yaje isatira cyane Kiyovu ku buryo bahise babona ibitego ku buryo buboroheye.Maxime Sekamana yaje gutsinda igitego cya kabiri ku mupira yari ahawe na Jean Iranzi hanyuma Yannick Mukunzi yongeramo icya gatatu kuri korineri yari itewe na Iranzi.

aprkiyovu14

Rutahizamu Michel Ndahinduka waje asimbura Bertrand Iradukunda yatsinze ibitego bibiri byiza maze ikipe ya APR bituma yinjira mu minsi mikuru ihagaze neza.

Nyuma y’umukino umutoza wungirije wa APR Vincent Mashami yagize ati, “Turishimye cyane kandi ndashimira abakinnyi ku kazi bamaze gukora. Urugendo ruracyakomeza kandi ndizera ko tuzava mu minsi mikuru dukomereza aha,”

Umutoza wa Kiyovu, Ali Bizimungu we yagize ati, “Ikipe ya APR yaturushije cyane. Mfite ikipe irimo abana bato, uko nateganyaga guhagarika APR siko aba bana babimfashijemo ariko sinabarenganya baracyari bato kandi ndizera ko uyu mukino udusigiye byinshi tugomba gukosora,”

APR ikomeje kuyobora urutonde rwa shampiyona n’amanota 26 mu gihe Kiyovu Sport yamanutse ku mwanya wa munani n’amanota 15.

Mu yindi mikino yabaye, ikipe ya AS Kigali yatsinze Espoir igitego 1-0 kuri Sitade ya Kigali; igitego cyatsinzwe na Cyubahiro Jacques.

I Rubavu, ikipe ya Rayon Sports yongeye gutakaza amanota nyuma yaho inganyije n’ikipe ya Marines 1-1. Ismael Uwihoreye niwe watsindiye Marines hanyuma Jerome Sina aza kugombora icyo gitego.

Ku Kicukiro, Police yatsinze Etincelles igitego 1-0 hanyuma Amagaju nayo icyura atatu imbere y’ikipe y’Isonga mu mukino warangiye ku gitego 1-0. I Rwamagana, Antoine Kakure yafashije Sunrise gutahana amanota atatu nyuma yo gutsinda igitego rukumbi mu mukino wabahuje na Gicumbi Fc.I Muhanga, Hussein Cyiza yatsindiye igitego kimwe rukumbi ikipe ya Mukura yatsinzemo ikipe ya Musanze.

Nyuma y’umunsi wa 11, ikipe ya APR iyoboye urutonde rwa shampiyona n’amanota 26, irarusha ikipe ya AS Kigali iri ku mwanya wa 2 amanota abiri.

Ikipe ya Police yazamutse ku mwanya wa gatatu n’amanota 20 mu gihe Rayon Sports iri ku mwanya wa kane n’amanota 19.

Ikipe y’Isonga iri ku mwanya wanyuma n’amanota atatu mu mikino 11 imaze gukina.

Shampiyona izongera gukinwa tariki ya 06/01/2014.

Uko umunsi wa 11 wagenze:

APR Fc 5-0 Kiyovu

Marines 1-1 Rayon Sports

AS Kigali 1-0 Espoir

Amagaju 1-0 Isonga

Sunrise 1-0 Gicumbi

Police 1-0 Etincelles

Mukura 1-0 Musanze

Tanga igitekerezo na Facebook

Tanga igitekerezo