APR nta mukinnyi mushya izagura

Yanditswe na Admin ku wa 11.06.2015 saa 10:29 | Yasuwe : 676

Mu kiganiro bagiranye n’itangazamakuru kuri uyu wa gatatu ,buyobozi bwa APR FC bwatangaje ko batiteguye kugura umukinnyi mushya,ko  bagiye kongerera abo bafite amasezerano kimwe n’umutoza Dusan Duje Suljagic wasimbuye Ljupko Petrović.

Umunyamabanga wa APR FC, Kalisa Adolphe yatangaje ko bafite umubare munini w’abakinnyi harimo benshi batabonye n’uko bakina muri shampiyona ariyo mpamvu nta mukinnyi mushya bazagarura.

Kalisa akomeza avuga ko bategereje ko igikombe cy’Amahoro kirangira ngo babone raporo y’abatoza bityo babone uko batangira ibiganiro n’abakinnyi bari kurangiza amasezerano yabo.Nibura abakinnyi icumi ba APR FC bari gusoza amasezerano y’imyaka ibiri bari bahawe bamwe muri bo bavuga ko bari kuganira n’amakipe yo hanze.

Kalisa yagize ati ” Abakinnyi dufite barahagije, twasanze badakoreshwa neza ngo babakinishe bose. Turangije igikombe cy’Amahoro, benshi bazongererwa amasezerano.”Kalisa Adolphe yahakanye amakuru yavugaga ko bandikiye Isonga yamanutse mu cyiciro cya kabiri basaba bamwe mu bakinnyi ari naho umwe muri aba bakinnyi yatangaje ko APR FC ari nka gereza.

apr15

Ni gake abakinnyi bigaragaje mu mwaka w’imikino bava muri APR FC bakajya gukina hanze, uheruka ni Niyonzima Haruna mu 2011 nubwo ubuyobozi buhakana ko bubazitira.

Umunyamabanga yakomeje agira ati ” Habonetse umukinnyi ujya muri APR FC muri uyu mwaka yaba adasanzwe ariko nabwo ntiyarenge umwe.”

Nyuma yo guhabwa APR FC kuko uwari umutoza mukuru Ljupko Petrović ataye ikipe akagenda, Dusan Duje Suljagic wari waragijwe iyi kipe igatwara igikombe cya shampiyona azongererwa amasezerano.Kalisa ati ” Abatoza bacu bazahabwa amahirwe yo gukomeza undi mwaka, bahereye hagati kandi batanga umusaruro.”

Mu gikombe cy’amahoro kigeze muri 1/8 cy’irangiza, APR FC yagitwaye mu 2014 izakina na Bugesera tariki ya 17 Kamena 2015.Ubwo uyu mwaka w’imikino watangiraga, APR FC yaguze Mwizeneza Djamal muri Rayon Sports, Bahati Arafat muri Etincelles, Bukebuke Yannick na Bigirimana Issa bavuye i Burundi biyongereye kuri Nkinzingabo Fiston na Rwigema Yves bari baragiye muri Espagne, abandi nka Kimenyi Yves na Iradukunda Bertrand bavuye mu Isonga ariko bari abakinnyi bayo.

Bamwe mu bakinnyi ba APR FC barangiza amasezerano : Ndoli Jean Claude, Kwizera Olivier, Rusheshangoga Michel, Bayisenge Emery, Mugiraneza Jean Baptiste, Ngomirakiza Hegman, Sibomana Patrick, Ndahinduka Michel, Nsabimana Eric na Tibingana Charles

 

Tanga igitekerezo na Facebook

Tanga igitekerezo