APR na Kiyovu nazo zinjiye neza muri shampiyona

Ku mikino ya kabiri y’umunsi wa kabiri wa shampiyona y’igihugu y’umupira w’amaguru wa 2014-2015 yabaye kuri iki cyumweru APR FC  na Kiyovu nazo zatangiye neza  zitsinda .

Mu mukino wahuje Apr na Musanze wabereye kuri stade ya Kigali i Nyamirambo igitego rukumbi  cya APR FC  cyatsinzwe na Sibomana Patrick ku mupira yari ahawe na Ngabo Albert mu gice cya mbere cy’umukino.

Umutoza wa APR FC, Dr Petrovic Ljubomir, atangaza ko bazakomeza kwitwara neza kurushaho kugira ngo bazatware n’igikombe cy’uyu mwaka.Uyu mutoza avuga ko mu mwaka ushize bari bafite ikipe nziza yatwara igikombe, ubu bikaba bitoroshye.

Okoko Godfroid, umutoza w’ikipe ya Musanze FC, atangaza ko batakaje uwo mukino mu buryo batatekerezaga kandi bakaba babyemeye.Godfroid avuga ko APR FC yabonye uburyo 2 bumwe umunyezamu akabukuramo, ariko bakaba bakinnye neza mu gihe APR yagize amahirwe.Uyu mutoza atangaza ko bari bafite abakinnyi benshi batashoboye gukina  bari bafite imvune akaba ari inzitizi kuri bo.Okoko akomeza atangaza ko bazakomeza gushyiramo imbaraga kugira ngo babe bakomeza kwitwara neza mu mwaka utaha.

sibopatrick

Sibomana Patrick watsindiye APR igitego( Photo izuba rirashe )

Kiyovu Sports nayo yitwaye neza ibicyesha rutahizamu wayo mushya waje aturuka muri  Vital’o y’ Burundi witwa Miamy Baby Mbakiye, wayitsindiye Marines FC ibitego 2-0 mu mukino wabereye ku Mumena, naho AS Kigali yitwara neza imbere ya Sunrise yari yasuye  i Rwamagana yitsinda igitego igitego 1-0.

Police FC nayo yagiye gutsindira Gicumbi iwayo 1-0 ibifashijwemo na rutahizamu Sebanani Emmanuel Crespo utari uherutse kwigaragaza  1-0.

Umunsi wa mbere wa shampiyona y’ikiciro cya mbere hano mu Rwanda itarabona umuterankunga usize ikipe ya Kiyovu Sports iyoboye urutonde rwa shampiyona .

Uko indi mikino yagenze kuri iki cyumweru 19 Ukwakira 2014 :

Gicumbi FC 0-1 Police FC (Gicumbi)

Kiyovu Sports 2-0 Marines FC ( Mumena)

Sunrise FC 0-1 AS Kigali (Rwamagana).

Imikino  yabaye kuwa gatandatu tariki ya 18 Ukwakira 2014 :

Rayon Sports 1-0 Amagaju FC (Stade ya Kigali)

Etincelles FC 2-2 Isonga FC (Stade Umuganda)

Espoir FC 1-0 Mukura Victory Sports ( Rusizi).

Tanga igitekerezo na Facebook

Tanga igitekerezo