APR inyagiye Rayon Sports iyibuza amahirwe y’igikombe

 APR FC yanyagiye bikomeye mucyeba wayo w’ibihe byose Rayon Sports iyinyagira ibitego 4-0 mu mukino wari witabiriwe nkuko bisanzwe n’imbaga y’abanyarwand.

Ibitego bya APR byatsinzwe na  Ndahinduka Michel, Mukunzi Yannick, Mugiraneza Jean Baptiste(Miggy) na Sekamana Maxime byatumye ikipe ya gisirikare ikomeza kurusha Rayon Sports amanota 13.

Rayon Sports yari imaze imikino 10 nta ntsinzi ubwo yatozwaga na Andy Mfutila, yari imaze kabiri itsinze Musanze muri shampiyona na Panthère du Ndé yo muri Cameroun igitego 1-0 ubwo yari imaze gufatwa n’umwungiriza we Habimana Sostene .
Umurundi Kwizera Pierrot wari utegerejwe n’abakunzi benshi wari wasinyiye Rayon Sports agasubira mu Burundi akagera mu mwiherero kuwa Gatatu yabanje mu kibuga ariko ntiyegeze yigaragaza cyane kimwe na Sina Jerome utaragiye muri Cameroun kubera ibyangombwa.

Mwiseneza Djamal wakinaga umukino wa gatatu na Rayon Sports yakiniye imyaka umunani yavunitse ku munota wa 10 asimburwa na Sekamana Maxime umwana wigaragaje cyane akina neza.Sina Jerome yashoboraga kubonera Rayon Sports igitego ariko umupira awutera hanze nyamara yari asigaranye n’umunyezamu gusa, amahirwe nk’aya bongeye kuyabona maze Peter Otema awutera hanze.

Igice cya mbere cy’uyu mukino cyarangiye Rayon Sports yihariye umukino ariko gutsinda igitego bikomeza kuba ihurizo.

Bagarutse mu kibuga, APR FC yaje yahinduye imikinire ikina  cyane imipira miremire yo ku mpande yanyuzwaga kwa Iranzi Jean Claude wahuraga na Imanishimwe Emmanuel wa Rayon Sports,umusore wasimbuye neza Sibomana Abuba werekeje muri Gor Mahia muri Kenya.

Ku munota wa 58, APR FC yatangiye gukinira imipira y’imiterekano mu rubuga rwa Rayon Sports, umupira wa Sekamana Maxime wagaruwe n’umutwe na Usengimana Faustin ujya muri koroneri, itewe yongera kuwukuramo ari wenyine mu izamu.

aprray15

Iyi kipe ya mbere ku rutonde rwa shampiyona yakomeje kotsa igitutu Rayon Sports, Ndahinduka Michel ateye mu izamu ugarurwa n’umunyezamu wa Rayon Sports, Ndayishimiye Eric “Bakame”, Usengimana awukuye mu rubuga rwabo, Mukunzi Yannick awuteye uca hejuru. Bayisenge Emery yatsinze igitego ku munota wa 67 ariko umusifuzi Ndagijimana Theogene aracyanga kuko yari yaraririye.

APR FC yatsinze igitego cya mbere ku munota wa 75, umupira abakinnyi ba Rayon Sports bananiwe gukura mu rubuga rwabo, Ndahinduka atera mu izamu.

Nyuma y’iminota ine, ku mupira watewe na Bayisenge Emery ahana ikosa hafi y’urubuga rwa Rayon Sports, Mugiraneza Jean Baptiste ashyira ku mutwe atsinda icya kabiri. Ni igitego cya mbere cya Migi nyuma yo kurongora Gisa Fausta tariki ya 7 Gashyantare 2015.

Na none ku mupira w’umuterakano, Mukunzi Yannick yatsindiye APR FC igitego cya gatatu gitsinzwe mu buryo bumwe na bibiri byabanje.Agashinguracumu ka APR FC katsinzwe na Sekamana Maxime ku munota wa 86 aherejwe na Iranzi Jean Claude umupira wavuye mu ruhande. Ni igitego cya mbere Sekamana atsinze muri uyu mukino ufatwa nk’uwa mbere ukomeye mu Rwanda.

Intsinzi isize APR FC ari iya mbere ku rutonde rwa shampiyona n’amanota 38 irusha Rayon Sports ya gatanu amanota 13.

Tariki ya 3 Werurwe 2013, Rayon Sports yatozwaga na Didier Gomez da Rosa yatsinze APR FC ya Nshimiyimana Eric ibitego 4-0. Nabwo igice cya mbere cyari cyarangiye baguye niswi.Hategekimana Aphrodis yatsinze icya mbere (51’), gikurikirwa n’icya Amissi Cedric (61’), Kambale Salita (69’ na 79’). Rayon Sports yashyizemo ikinyuranyo cy’amanota icyenda.

aprray15zcAbakinnyi ba Rayon Sports babanje mu kibuga

Ndayishimiye Eric “Bakame”, Manzi Sincere Huberto, Imanishimwe Emmanuel, Usengimana Faustin, Tubane James, Ndatimana Robert, Bizimana Djihad, Kwizera Pierrot, Sina Jerome, Peter Otema na Ndayisenga Fuad.

aprray15zdAbakinnyi ba APR FC babanje mu kibuga

Kwizera Olivier, Rusheshangoga Michel, Ngabonziza Albert, Bayisenge Emery, Nshutinamagara Ismael, Mugiraneza Jean Baptiste, Mukunzi Yannick, Mwiseneza Djamal, Iranzi Jean Claude, Bigirimana Issa na Ndahinduka Michel.

Dore uko byari byifashe mu mafoto :

Indi mikino yabaye :

Songa Isaie yatsinze ibitego bitatu AS Kigali yatsinze Mukura VS i Muhanga. Ni ku nshuro ya gatatu muri iyi shampiyona umukinnyi atsinda ibitego bitatu mu mukino umwe nyuma ya Tuyisenge Jacques wa Police FC na Muhindo Jean Pierre w’Amagaju. Mukura VS imaze imikino irindwi itabona intsinzi.

Sunrise yatsindiye Amagaju i Nyamagabe igitego 1-0 naho indi mikino isigaye amakipe agwa miswi, Etincelles FC 0-0 Espoir FC, Isonga 0-0 Kiyovu Sports, Police FC 0-0 Marines FC, Musanze FC 0-0 Gicumbi FC.

Tanga igitekerezo na Facebook

Tanga igitekerezo