APR ikomeje gutsinda ,Rayon yanganyije na Police

Yanditswe na Rwanda Football ku wa 07.01.2015 saa 08:42 | Yasuwe : 738

Ku munsi wa cumi na kabiri wa shampiyona y’icyiciro cya mbere, APR FC ikomeje kwitwara neza mu gihe mucyeba wayo Rayon Sports ikomeje gutakaza amanota.

APR yatsinze ikipe y’Isonga ibitego 2-0 kuri Sitade ya Kigali I Nyamirambo.Yannick Mukunzi yatsinze igitego cya mbere n’umutwe nyuma umukinnyi mushya  Bigirimana Issa aza gutsinda igitego cya kabiri nyuma yo gucenga abinyuma b’ikipe y’Isonga mu mukino we wambere yari akinnye muri iyi shampiyona.

Mu wundi mukino Rayon Sports yatangiye umwaka inganya 0-0  na Police FC i Muhanga.Uyu mukino wari utegerejwe n’abakunzi benshi ndetse n’abandi bakunda umupira wabereye i Muhanga aho Rayon Sports yari yakiriye Police FC.

Abakunzi ba Rayon Sports bari biteze ko umutoza Mfutila umaze gukina imikino ine yose nta ntsinzi noneho aza kwisubiraho akabatsindira Police agasubiza ikipe yabo ku mwanya wa gatatu.

Police FC yari yatangiye umukino neza inarusha Rayon Sports ariko byose biza guhinduka ubwo abakinnyi ba Rayon Sports binjiraga neza mu mukino .

rayonpolice15c

Photo : Ruhagoyacu

Nubwo ariko bitashobotse ikipe ya Rayon Sports yerekanye umukino mwiza kuko yarushije bigaragara  ikipe ya Police FC cyane cyane mu gice cya 2  aho ba rutahizamu bayo  bateye amashoti akomeye cyane agafata umutambiko inshuroenye zose abafana bizeye ibitego kandi bakaba banahusije n’ubundi buryo bwinshi imbere y’izamu rya Police FC. Police FC yo yahisemo kurinda izamu ishaka uko umukino warangira ari 0-0.

Mu yindi mikino, Amagaju yanganyije na Musanze 1-1 i Musanze, mu gihe Marines FC yatsindiwe i Rusizi igitego 1-0 na Espoir FC, naho Etincelles na Mukura banganya igitego 1-1.

Kuri uyu wa gatatu hategerejwe imikino ibiri aho Kiyovu Sports yakira Sunrise ku Mumena, naho Gicumbi FC yakire AS Kigali i Byumba.

APR Fc ikomeje kuyobora urutonde rwa shampiyona n’amabota 29 mu mikino 12 aho ikurikiwe na AS Kigali ku mwanya wa kabiri n’amanota 24 mu gihe Police iri ku mwanya wa gatatu n’amanota 21. Rayon Sports iri ku mwanya wa kane n’amanota 20.

Ikipe y’Isonga iri ku mwanya wa cumi n’akane n’amanota atatu.

Tanga igitekerezo na Facebook

Tanga igitekerezo