APR FC yegukanye igikombe cya Prudence

Yanditswe na Admin ku wa 02.02.2015 saa 10:23 | Yasuwe : 940

Ikipe ya APR FC yegukanye irushanwa ryo gukangurira Abanyarwanda gukoresha agakingirizo (prudence) nyuma yo gutsinda Police ibitego 2-1.

Uyu mukino wa nyuma wabaye kuri iki cyumweru kuri sitade Amahoro i Remera.Ku wa gatandatu ikipe ya Apr yari yasezereye As Kigali iyitsinze 2-0 naho Police yari yasezereye Rayon Sports iyitsinze kuri penaliti.AS Kigali nayo yegukanye umwanya gatatu nyuma yo gutsinda Rayon Sport kuri penaliti 4-3.

Abakinnyi batsindiye ikipe ya APR ni Hegman Ngomirakiza ku munota wa 56 w’igice cya kabiri cy’umukino, icya kabiri ni Iranzi Jean Claude ku munota wa 57 w’igice cya kabiri cy’umukino.Tuyisenge Jacques nawe yaje gutsindira ikipe ya Police igitego kimwe ku munota wa 78 w’igice cya kabiri cy’umukino.

Mashami Vincent umutoza wungirije mu ikipe ya APR yatangaje ko bishimiye kuba begukanye iri rushanwa kuko bitera imbaraga abakinnyi zo gukomeza gukora bashyize hamwe.Yagize ati “iri rushanwa ryadufashije kureba ubushobozi bw’abakinnyi dufite kuko hariho abatabona umwanya wo gukina muri shampiyona ubu bakabasha kwigaragaza”.

Avuga ko iri rushanwa ribasigiye byinshi ndetse hari n’udukosa twagiye dukorwa bagiye kugerageza gukosora kugira ngo bazagira inota na rimwe batakaza mu marushanwa ari imbere.

aprpoliceprudence

Casa Mbungo André umutoza wa Police FC yatangaje ko atishimiye na gato imisifurire kuko itagenze neza ndetse yanatakarijemo umukinnyi umwe ndetse na kapiteni ufite amakarita abiri y’umuhondo.Yagize ati “iri rushanwa ntiryari rikwiye muri iki gihe kuko dufite shampiyona idutegereje mu ntangiriro z’iki cyumweru nibazaga ko abategura amarushanwa nk’aya bakabanje kureba niba bitazitira amakipe aba ari muri shampiyona”.

Cassa yakomeje agaragaza akababaro ke  nyuma y’iyi mikino .Yagize ati :“Ntibyoroshye kugira icyo mvuga, kuko ibyo mbonye bisa nk’ibyo nabonye ku mukino wa As Kigali(na APR FC). Ibitego bibiri badutsinze ntibitandukanye nk’icyo batsinze As Kigali ku munsi wejo, aho batsindaga babanje gukora amakosa ariko umusifuzi ntabyiteho”, Cassa nyuma yo gutsindwa na APR FC.

cassamfutila

Cassa na Mfutila ku mukino wo ku wa gatandatu Police na Rayon

“Siporo yacu imeze nk’iri mu bucakara ntabwo twakora gutya dushaka guteza imbere umupira wacu”.Ntabwo byoroshye gukina uzi neza ko hari ikipe igomba gutsinda uko byagenda kose”.Ubwo ni bwo bucakara turimo. Dufite urugendo rurerure ngo tubuvemo. Abibaza impamvu umupira wacu udatera imbere ni ibingibi ntihagire ahandi mushakira ikibazo.Abantu bari kugenda bagabanuka ku bibuga kubera ibi ndetse mu minsi iri imbere hari amakipe azabura ayo bakina”.

Umunyamakuru yamubajije niba byari itegeko kwitabira iri rushanwa,umutoza asubiza ko nawe nta kundi yari kubigenza kuko ntacyo yahindura ku biba byateganyijwe.

Uyu mutoza wakomeje avuga ko siporo yo mu Rwanda idateguwe neza, nkaho bitumvikana uburyo ikipe ye yemeye gukina irushanwa ritayifitiye akamaro, none rikaba risize nta rutahizamu numwe izaba ifite ku mukino wa shampiyona wo mu mpera z’icyumweru

Police FC iza ku mwanya wa gatatu muri shampiyona n’amanota 24, izaba isura Kiyovu Sportsmu mpera z’icyumweru  mu mukino w’umunsi wa 15 wa shampiyona. Iyi kipe kuva uyu mwaka wa shampiyona watangira, ikaba imaze gutakaza abakinnyi barindwi barimo batandatu babanzaga mu kibuga, abakinnyi bose bagiye kubera ko byasanzwe ko atari abanyarwanda.

Nshimiyimana Eric, umutoza wa AS Kigali yegukanye umwanya wa gatatu, yatangaje ko yishimiye kwegukana umwanya wa gatatu nubwo atariyo ntego kuko bifuzaga gukina umukino wa nyuma.Yagize ati “twe twifuza y’uko amarushanwa nk’aya yajya aba nibura buri mezi babiri kuko byadufasha gutegura imbere hamwe n’amakipe yacu”.

Avuga ko iri rushanwa kuba rirangiye AS Kigali yo iracyafite urugamba rukomeye kuko yifuza amanota atatu kuri APR mu mukino kugira ngo ibashe gukomeza guhatanira igikombe cya shampiyona.

Muri iri rushanwa hahembwe amakipe atatu gusa aho: APR ya mbere yegukanye miliyoni 3,iya kabiri Police FC miliyoni 2 na AS ya gatatu yegukanye miliyoni 1.Iyi mikino y’umupira w’amaguru yo kurwanya icyorezo cya SIDA yateguwe n’Ishyirahamwe ry’umupira w’amaguru mu Rwanda (FERWAFA) ku nkunga ya “Society for Family Health”.

Tanga igitekerezo na Facebook

Tanga igitekerezo