APR FC yatsinze Gicumbi FC isubira ku mwanya wa mbere

Yanditswe na Rwanda Football ku wa 09.05.2019 saa 19:49

Ikipe ya APR FC yisubije umwanya wa mbere ku rutonde rwa shampiyona y’icyiciro cya mbere, nyuma yo kujya gutsindira Gicumbi FC ku kibuga cyayo ibitego 3-1, mu mukino ubimburira umunsi wa 27 wa shampiyona. 

Ni umukino APR FC yagiye gukina imaze iminsi yambuwe na Rayon Sports, nyuma yo kutitwara neza inanirwa gutsinda imikino ibiri ya shampiyona yaherukaga kunganya n’amakipe ya Kiyovu Sports na AS Kigali.

APR FC yarangije igice cya mbere iri imbere n’ibitego 2-1. Igitego cya mbere yari yagitsindiwe na Danny Usengimana ku munota wa kane w’umukino, mbere y’uko Nshuti Dominique Savio atsinda igitego cya kabiri ku munota wa 40 w’umukino.

Hagati aho ku munota wa 16 w’umukino Gicumbi FC yari yabonye igitego ibifashijwemo na Okene Lulu. Ni nyuma y’amakosa ya ba myugariro ba APR FC bananiwe gukiza izamu ryabo bikarangira uyu rutahizamu wa Gicumbi FC abishyuye igitego.

Ikipe ya Gicumbi FC yakinnye iminota myinshi y’igice cya kabiri cy’umukino itari gutozwa na Banamwana Camarade usanzwe ari umutoza mukuru wayo, nyuma yo koherezwa mu bafana ku munota wa 60 w;umukino azira gushwana n’abasifuzi.

Iki gice cya kabiri cy’umukino cyaranzwe no gusatirana hagati y’amakipe yombi, gusa birangira APR FC ari yo ibyungukiyemo kuko yaje kukibonamo igitego cya gatatu. Ni igitego cyatsinzwe na Nshuti Innocent winjiye mu kibuga asimbura Danny Usengimana, ku mupira mwiza yari ahawe na Byiringiro Lague.

Rutahizamu Issa Bigirimana wari umaze iminsi atagaragara mu bakinnyi 18 ba APR FC,yagarutse muri uyu mukino aho yinjiye mu kibuga asimbuye Byiringiro Lague ku munota wa 94. 

Amanota atatu APR FC yakuye i Gicumbi yayifashije kwisubiza umwanya wa mbere ku rutonde rwa shampiyona n’amanota 62, mu gihe igitegereje ibizava mu mukino uzahuza Amagaju na Rayon Sports ku munsi w’ejo. Iyi Rayon Sports yo yahise ijya ku mwanya wa kabiri n’amanota 60, gusa mu gihe yaba itsinze Amagaju ejo yahita yisubiza umwanya wayo wa mbere.

Urutonde rwa shampiyona y’icyiciro cya mbere 2018 – 2019 :

Pos   Team Pld W T L GoalsDiff Pts
1 Rayon Sports 28 21 3 4 45 - 14+31 66
2 APR FC 28 19 5 4 44 - 14+30 62
3 Mukura VS 28 16 7 5 36 - 21+15 55
4 Police FC 28 15 4 9 44 - 30+14 49
5 Kiyovu Sports 28 12 6 10 31 - 20+11 42
6 As Kigali 28 9 11 8 35 - 26+9 38
7 Etincelles FC 28 11 3 14 25 - 28-3 36
8 Espoir FC 28 10 6 12 31 - 40-9 36
9 As Muhanga 28 9 8 11 39 - 38+1 35
10 Marines FC 28 8 10 10 20 - 21-1 34
11 Sunrise FC 28 8 9 11 28 - 34-6 33
12 Bugesera FC 28 7 10 11 26 - 39-13 31
13 Musanze FC 28 8 6 14 23 - 37-14 30
14 Kirehe FC 28 6 9 13 16 - 32-16 27
15 Gicumbi FC 28 7 6 15 16 - 40-24 27
16 Amagaju FC 28 4 5 19 20 - 45-25 17
Tanga igitekerezo