APR FC yahawe igikombe cya Shampiyona

Yanditswe na Rwanda Football ku wa 15.05.2015 saa 22:01 | Yasuwe : 1,149

Kuri uyu wa gatanu kuri sitade Amahoro i Remera , imbere y’abafana bacye, abayobozi barimo Umugaba w’Ingabo, Minisitiri w’imikino n’umuyobozi wa Ferwafa, ikipe ya APR FC  iyoboye urutonde yanganyije n’Isonga FC ya nyuma ku rutonde rwa shampiyona.

Muri uyu mukino wa nyuma wa shampiyona itarashimishe abakunzi b’umupira w’amaguru mu Rwanda  wagombaga kurangira APR ihabwa igikombe cya shampiyona yatwaye  nta guhangana gukomeye kugaragaye, abafana bari bacye ku bibuga , umukino n’Isonga nawo ntiwari uryoheje ijisho.

Ibi bikaba byibazwa cyane n’abakurikirana hafi umupira w’amaguru mu Rwanda aho ikipe imwe itwara ibikombe 15 mu myaka 20 .Abenshi banemeza ko nta hangana rikigaragara mu makipe yacu aho harimo ubusumbane bukomeye mu mikoro.

Michel Ndahinduka wa APR FCutari uherutse kwigaragaza  niwe watsinze ibitego byombi bya APR FC muri uyu mukino umutoza yahaye umwanya wo gukina abakinnyi bakiri bato nk’umuzamu Yves Kimenyi, Bertrand Iradukunda n’abandi.

Isonga FC ibitego byayo byatsinzwe na  Danny Usengimana uherutse kugurwa na Police FC, ibi ntibyabujije iyi kipe nayo kuzamanuka mu cyiciro cya kabiri kuko ari iya nyuma n’amanota 17 gusa mu gihe yahanganaga na APR FC ya mbere y’amanota 51 mu mikino 24 yakinnye.

aprchampions15

Mu gutanga igikombe cya 15 mu myaka 20 cya APR FC cyateruwe na Vincent de Gaulle Nzamwita uyobora FERWAFA agishyikiriza Minisitiri w’Umuco na Siporo Julienne Uwacu nawe agiha Nshutinamagara Ismael kapiteni w’abandi muri APR FC.

Mashami Vincent utoza APR FC yatangaje ko yishimiye ko batwaye igikombe cya kabiri bikurikiranya.Avuga ko icyo barushije abandi ari  ubuyobozi bwiza bwababaye hafi bukabatera inkunga ishoboka yose.Uyu mutoza wahawe kandi amasezerano y’umwaka umwe mu ikipe y’igihugu yatangaje ko imbere he muri APR  hazagengwa n’abayobozi b’iyi kipe.

Ngabo Albert myugariro wa APR we yatangaje ko icyo barushije abandi kugira ngo batware igikombe ari ubuyobozi butuma ikipe itagira ikibazo igahemberwa ku gihe bakabona ibyo bakenera byose nk’ikipe.

Abasore nka Fiston Nkinzingabo, Bertrand Iradukunda, Yves Kimenyi na Yves Rwigema ni igikombe cyabo cya mbere batwaye cya shampiyona.

 

Tanga igitekerezo na Facebook

Tanga igitekerezo