APR FC ntirafata icyemezo cyo guhagarika umutoza Dusan

Yanditswe na Admin ku wa 08.08.2015 saa 17:44 | Yasuwe : 1,168

Umuvugizi w’ikipe ya APR FC Gatete George arahakana amakuru yavugaga ko iyi kipe iri mu nzira zo gusezerera umutoza  mukuru Dusan Dule ukomoka muri Seribia.

Uyu mugabo biravugwa ko yaragaragaje umusaruro mubi mu mikino ya CECAFA Kagame Cup 2015 y’uyu mwaka aho APR FC yaviriyemo muri ¼  , inyagiwe na Khartoum yo muri Sudani  ibitego 4-0.

Gatete yavuze ko batigeze babona umwanya wo kwicarana n’uyu mutoza usigaje amezi 5 ku masezerano ye  kugira ngo baganirire ku musaruro we kuva yatangira kugeza ubu, ariko bazabikora nibahuguka kuko bashishikajwe no gutegura  imikino ya gisirikare  izabera i Kampala muri uku kwezi.

Gatete yagize ati ” Ntabwo birarangira, turacyari kumwe nawe kuko tutarabona umwanya wo kwicara ngo twige ku bye ariko amasezerano ye ari hafi kurangira. Aho ni ho tuzicara tukareba umusaruro yatugejejeho tukareba niba tuzamwongerera ariko ibyo kuvuga ngo twamuhagarika ntituricara ngo tubitekerezeho”.

Umutoza-Dusan

Gatete  yahakanye kandi ko bateguraga inama ya vuba yo kwiga kuri uyu mutoza. Ati ” Ntabyo, duhugiye mu byo gutegura  imikino ya gisirikare. Icya ngombwa si ukumwirukana, icya ngombwa ni ukureba icyo amaze kutugezaho mu byo twari twamusabye tukareba niba ari 50% cyangwa ari 100%”.

N’ubwo atakwemeza umunsi bizabera, Gatete avuga ko bazicarana n’uyu mutoza bakareba ibibura mu ikipe mbere yo gutangira shampiyona. Ariko ku byo gusuzuma umusaruro we byo bishobora kuzaba nyuma.

Hari isomo APR FC yakuye muri CECAFA

Nyuma yo gutsindwa na   Khartoum ibitego 4-0, ubuyobozi bwa APR FC busanga byaraberetse ko bakwiye  gushyira ingufu mu gufasha abakinnyi barimo n’abashya kumenyerana nyuma y’igenda ry’abakinnyi nka  Mugiraneza Jean Baptiste Migi na Bayisenge Emery. Ibi bikazanyura mu mikino myinshi ya gicuti.

Asobanura ku musaruro w’iyi kipe muri CECAFA Kagame Cup 2015, umuvuguzi wayo Gatete  yagize ati ” Ntabwo byadushimishije uko bitwaye kuko ibyo batumwe batabigezeho, ntabwo imyiteguro yabo ari mibi. Isomo bidusigiye  ni ugushyira imbaraga mu myitozo, cyane cyane mu kumenyereza abakinnyi bazajya mu myanya ya ba Bayisenge na  Migi ku buryo bazatangira shampiyona bari ku rwego rumwe n’abandi, ibyo bizanyura mu gukina imikino myinshi ya gicuti”.

Nyuma yo kumara imyaka 2 yikurikiranya itsindirwa ku  mukino wa nyuma, uyu mwaka APR FC yaviriyemo muri ¼ .

Tanga igitekerezo na Facebook

Tanga igitekerezo