APR FC na Rayon Sports FC mu isura nshya muri Shampiyona itaha

Yanditswe na Rwanda Football ku wa 28.07.2015 saa 00:54 | Yasuwe : 1,025

Nyuma y’aho ikipe ya Rayon Sports itakarije abakinnyi benshi biganjemo ababanzaga mu kibuga bari bayifatiye runini  , ubu mukeba wayo APR FC nayo iragenda yototerwa n’icyo kibazo cyo gutakaza benshi mu bakinnnyi babanzaga mu kibuga muri shampiyona itaha.

Ikipe ya Rayon Sports niyo yatangiye gutakaza abakinnyi mbere shampiyona igeze hagati ubwo abakinnyi babiri bakina inyuma, Nizigiyimana Abdul Karim Makenzi na Sibomana Abouba bayivagamo bakajya gukina muri Kenya.

Nyuma yaho haje kwiyongeraho rutahizamu Sina Jerome wirukanywe ndetse na Robert Ndatimana wagiye muri Police FC nyuma y’igihe adacana uwaka n’aba bayobozi b’i Nyanza.

Ntibyagarukiye aho ubwo shampiyona yarangiraga Rayon Sports iri ku rugamba rwo gushaka igikombe cy’Amahoro abandi bakinnyi babiri bayivuyemo berekeza muri Kenya , abo ni Fuadi Ndayisenge  wari kapitene , na Hategekimana Aphrodis Kanombe na we wigeze kuba kapiteni.

Nyuma gato abakunzi b’iyi kipe batunguwe no kumva amakuru ababaje avuga ko Bizimana Djihad yamaze kubacika akigira muri mukeba APR FC . Ibi byaje bikurikira rutahizamu wabatsindiye ibitego byinshi Muganza Isaac wagiye muri Police FC asanzeyo impanga ye.

Kugeza ubu hari abandi bakinnyi barimo Usengimana Faustin na Romami Frank nabo bashobora kugenda. Gusa uko aba bagiye niko nayo yazanye abandi babasimbura gusa utahamya ko bari ku rwego rw’abagiye kugeza ubu Rayon Sports imaze gusinyisha abakinnyi bane byemewe n’amategeko.

Abo ni Nshuti Dominique Xavio na Kevin Muhire bavuye mu Isonga FC na Manzi Thiery wavuye muri Marines ndetse na Mugenzi Cedrick wavuye muri Gicumbi.

aprrayon15

Uretse aba hari n’abandi benshi bivugwa ko ibiganiro bigeze kure ngo baze gukinira Rayon Sports. Bakiyongera kuri aba bashya ndetse n’abandi bamaze kongera amasezerano bayobowe n’umuzamu Ndayishimiye Eric Bakame , Rukundo Jean Marie, Uwambazimana Leon na Kanamugire Moses.

Ibi byose bigaragaza ko umwaka utaha abafana b’iyi kipe izwiho kugira abafana benshi bazabona ikipe nshya itandukanye cyane n’iyo bari bafite umwaka ushize.

Mu gihe benshi bari bakibaza ku mpinduka ziri kuba muri Rayon Sports , ubu amakuru ni uko na mukeba wayo APR FC ishobora gutakaza abakinnyi benshi mu babanzaga mu kibuga umwaka washize.

Nyuma ya Emery Bayisenge , Mugiraneza Jean Baptiste Migi, Ngomirakiza Hegman na Kwizera Olivier byamaze kwemezwa ko umwaka utaha batari kumwe na APR FC ,ubu hamaze kwiyongeraho abandi bakinnyi babiri aribo Mukunzi Yannick na Rusheshangoga Michael nabo bivugwa ko bamaze kumvikana n’ikipe ya Yanga Africa , ndetse na Tibingana Charles nawe wamaze kwemeza ko umwaka utaha atifuza gukina muri APR FC.

Nubwo aba bagenda ikipe ya APR FC yamaze gutangaza ko umukinnyi yaguze byemewe n’amategeko ari umwe gusa. Bizimana Djihad ndetse na Usengimana Faustin bitaremezwa neza ko bamuguze.

Gusa ukurikije urutonde rw’abakinnyi bagiye n’abateganya kugenda bigaragaza ko APR FC nayo izitabira isoko ryo kugura abakinnyi.Ibi byose bigaragaza ko aya makipe y’ubukombe hano mu Rwanda umwaka utaha yose azaba agaragaza isura nshya ugereranyije n’uko yari ameze umwaka washize.

Mu kiganiro abayobozi ba APR FC baheruka kugirana n’abanyamakuru bari bavuze ko ikipe yabo yuzuye nta mukinnyi wundi bazagura, ariko nyuma yo gutakaza bamwe mu b’imena bari bafite byahise bigaragaza ko APR FC nayo izagura bakinnyi.

Tanga igitekerezo na Facebook

Tanga igitekerezo