APR FC iyoboye urutonde ku munsi wa gatatu

Yanditswe na Rwanda Football ku wa 26.10.2014 saa 19:53 | Yasuwe : 933

Ku munsi wa gatatu wa shampiyona y’umupira w’amaguru mu Rwanda ,APR FC yatsinze bitego 2-0 Etincelles FC biyiha uburenganzira bwo guhita iyobora urutonde.

Abakinnyi batsinze ibitego bya APR ni Mubumbyi Bernabé wagitsinze ku munota wa 35 w’igice cya mbere na Iranzi Jean Claude watsinze icya kabiri ku munota wa 53 w’igice cya kabiri.

Mashami Vincent umutoza wungirije w’ikipe ya APR FC avuga ko abakinnyi bagerageje kwitwara neza kuko babanje kumara iminota 15 batarinjira mu mukino.

Yagize ati “turagerageza uko dushoboye kose kugira ngo tutazagira umukino n’umwe dutakaza kuko iyo utsinzwe umukino bigora kongera kwisubiza amanota uba watakaje”.

apr_fc-2

Avuga ko n’indi mikino yose isigaye bazagerageza kuyitwaramo kuko iyo shampiyona igitangira abakinnyi baba batari binjira neza mu mikino.

Bizumuremyi Radjab umutoza wa Etincelles FC avuga ko batangiye neza, ariko baje guhuzagurika muri ba myugariro.Yagize ati ” mu minota nka 30 y’igice cya mbere

twagerageje gukina neza, ariko twaje kugira igihunga muri ba myugariro bituma dutsindwa igitego cya mbere bituma abakinnyi bacika intege”.

Mu yindi mikino ikipe ya Mukura ikomeje kwinjira nabi muri shampiyona kuko yongeye gutsindwa umukino wayo wa gatatu wa shampiyona na Kiyovu 3-1.

kuri icyi cyumweru kuri stade ya Kigali i Nyamirambo Rayon Sports fc yakiriye musanze fc umukino urangira amakipe yombi anganyije igitego kimwe kuri kimwe .

Rayon sports niyo yafunguye amazamu mu gice cya mbere cy’umukino aho  Ndayisenga Fuadi witanze muri uyu mukino wose yatsindiye igitego cya mbere ku munota wa 17 .

Ntibyatinze ku ishoti rikomeye Musanze ibifashijwemo na Bizimana Djuma  yishyura igitego yatsinzwe maze igice cya mbere kirangira  banganyije kimwe kuri kimwe.

Mu igice cya kabiri umukino waranzwe no guhusha ibitego ku mpande zombi ku buryo ku munota wa nyuma kapiteni wa Rayon Sports Ndayisenda Fuadi yari atumye aba Rayon barara neza ariko biranga kuko umupira yawuteye ku mutambiko w’’izamu birangira ari igitego kimwe kuri kimwe.

Uko indi mikino yarangiye :

ku wa gatandatu 25 Ukwakira 2014.

Kiyovu 3-1 Mukura

AS Kigali 2-1 Marines

Espoir 2- 0 Isonga FC

Gicumbi 1- 0 Amagaju

APR FC 2 -0 Etincelles

Sunrise 1-0 Police.

Ku cyumweru 26 Ukwakira 2014

Rayon Sports 1-1 Musanze.

Urutonde rwa shampiyona rwa agateganyo :

1 APR 3 4 9
2 Police 3 6 7
2 Rayon 3 6 7
4 AS Kigali 3 2 6
5 Espoir 3 2 6
6 Gicumbi 3 1 6
7 Kiyovu 3 -1 6
8 Musanze 3 0 4
8 Sunrise 3 0 4
10 Amagaju 3 -1 3
11 Etincelles 3 -3 1
12 Isonga 3 -7 1
13 Mukura 3 -4 0
14 Marines 3 -5 0

Tanga igitekerezo na Facebook

Tanga igitekerezo