APR FC ifite umutoza mushya

Yanditswe na Rwanda Football ku wa 05.08.2014 saa 13:16 | Yasuwe : 558

Ikipe ya APR FC kuri ubu ifite umutoza mushya  ukomoka mu gihugu cya Serbia, yitwa Dr Ljubomir Petrovic akaba yahawe amasezerano y’umwaka umwe.

Mu gusinya amasezerano y’umwaka umwe uyu mutoza yahawe inshingano zo kugeza ikipe mu matsinda mu mikino y’amakipe yabaye aya mbere iwayo ku mugabane w’Afurika (CAF Champion’s League).Akaba asabwa kandi  gutwara ibikombe bibiri bikinirwa mu Rwanda byaba shampiyona ndetse n’igikombe cy’Amahoro.

Ubu APR yari ifitwe n’umutoza Mashami  Vincent waje asimbuye umudage Andreas Spier wayitozaga akaba yareguye.

ljupko-petrovic
Uyu mutoza mushya wa APR Dr Ljubomir afite imyaka 67 akaba amaze imyaka 32 mu kazi k’ubutoza.Uyu mugabo w’inararibonye yatwaye igikombe cy’irushanwa ry’amakipe yabaye aya mbere iwayo ku mugabane w’Uburayi (UEFA Champions League) ubwo yatozaga Red Star Belgrade yo muri Serbia mu mwaka wa 1991.

Uyu mutoza yegukanye shampiyona y’icyiciro cya kabiri muri Yougoslavie ubwo yatozaga Partak Subotica muri 1988, atwara shampiyona 1989 atoza Vojvodana Novi Sad, atwara shampiyona ya Yougoslavie n’igikombe cy’igihugu ari kumwe na Red Star Belgrade.

Petrovic yatoje  amakipe atandukanye nka Osijek, Espanyol Barcelona, Spartak Subotica,Yugoslavia U18 ,Yugoslavia U21,Vojvodina,Rad, Red Star Belgrade,Peñarol,PAOK Athene, Shanghai Shenhua,Levski Sofia na Beijing Guoan.

Ikipe ya APR FC iritegura imikino ya Cecafa Kagame Cup izabera mu Rwanda tariki ya 8 Kanama 2014.

Tanga igitekerezo na Facebook

Tanga igitekerezo