Amavubi yageze muri Mozambique

Yanditswe na Admin ku wa 13.06.2015 saa 21:02 | Yasuwe : 759

Nyuma y’urugendo rw’amasaha icyenda, Amavubi yageze i Maputo ku gicamunsi cyo kuri Gatanu, barakora imyitozo kuri Estadio national de Zimpeto bazakiniraho ku Cyumweru na Mozambique mu majonjora y’igikombe cy’Afurika 2017 kizabera muri Gabon.

Amavubi yageze muri Mozambique saa saba n’igice kuri uyu wa Gatanu bajyanwa gucumbika muri Afrin Prestige Hotel mu mujyi wa Maputo.

Biteganyijwe ko mu gitondo cyo kuri uyu wa Gatandatu bakora imyitozo yo kurambura imitsi (gym) maze bakorere imyitozo kuri stade nkuru ya Mozambique, Estadio national de zimpeto, bazakiniraho ku Cyumweru saa munani.

Niyonzima Haruna, kapiteni w’Amavubi asaba Abanyarwanda kwibagirwa ibihe byahise kuko bashaka gukora cyane mu mikino iri imbere aho bari mu itsinda H na Ghana, Mozambique n’ibirwa bya Maurice.

amavmoz

Yagize ati “ Turi mu bihe bishya, ibyahise byarahise babyibagirwe kuko imikino iri imbere dushobora gukora neza. Twazanywe hano [Maputo] no gutsinda byakanga ntitubure inota, ntidushaka gutsindwa.”

Ni umukino wa mbere ku ikipe nkuru ku mutoza Jonathan McKinstry umaze kubona intsinzi ebyiri mu mikino muri irindwi yatoje.

Nyuma yo gukina na Mozambique, u Rwanda ruzakira Ghana muri Nzeli mu mukino wa kabiri wo mu itsinda H.

Abakinnyi 18 bari i Maputo

Kwizera Olivier, Ndayishimiye Eric, Rusheshangoga Michel, Bayisenge Emery, Rugwiro Herve, Usengimana Faustin, Rutanga Eric, Sibomana Abouba, Niyonzima Haruna, Buteera Andrew, Mugiraneza Jean Baptiste, Bizimana Djihad, Mukunzi Yannick, Sibomana Patrick, Iranzi Jean Claude, Ndahinduka Michel, Sugira Ernest na Tuyisenge Jacques.

Tanga igitekerezo na Facebook

Tanga igitekerezo