U23 yatangiye kwitegura Uganda adafite umutoza mukuru

Yanditswe na Admin ku wa 27.05.2015 saa 21:57 | Yasuwe : 1,130

Ikipe y’Igihugu Amavubi y’abatarengeje imyaka 23 ikomeje imyitozo yo kwitegura ikipe ya Uganda idafite umutoza mukuru John McKinstry na  bamwe mu bakinnyi bafite ibibazo by’imvune

Uyu mutoza mukuru usa nkuetaye abakinnyi be ku rugamba ngo yagiye mu masomo azamara icyumweru mu burayi, ibintu bitavugwaho rumwe n’abakunzi benshi b’umupira w’amaguru.

Kuri uyu wa kabiri ikipe y’igihugu Amavubi yakomeje imyitozo yayo yo kwitegura ikipe y’igihugu ya Uganda nayo y’abatarengeje imyaka 23, aho abakinnyi nka Muvandimwe JMV wa Gicumbi,Sekamana Maxime na Kwizera Olivier batabashije gukora imyitozo kubera ikibazo cy’imvune.

Nk’uko byatangajwe n’Umutoza Mashami Vincent uri kuyobora iyi myitozo, abakinnyi Sekamana Maxime na Muvandimwe JMV ntibazakina uyu mukino aho bahise basimbuzwa Vedaste Niyibizi (Sunrise Fc) na Antoine Ndayishimiye, rutahizamu wa Gicumbi Fc.

Muri iyi myitozo kandi iyi kipe yanasuwe na Vedaste Kayiranga,Visi Perezida wa Ferwafa aho yatangaje ko byari ngombwa ko bakomeza kuba hafi iyi kipe hafi ndetse banayiha icyizere ko ibitego batsinzwe nabo bashobora kubyishyura bakanarenzaho

Kayiranga Vedaste ati”Ni abana bakeneye ko tubaba hafi, biba bisaba kubategura hakiri kare,nyuma y’imyitozo twabibutsaga ko intsinzi ariyo bari gutegura atari ugukina byo kwishyushya, kandi ndahamya ko ibitego 2-1 badutsindiye hano natwe twajyayo tukabibatsinda cyangwa tukanabirenza”
uwacuamavubi
Photo Kigalitoday

Ku ruhande rw’Umutoza Mashami Vincent we asanga hari icyizere nyuma y’imyitozo ikipe imaze iminsi ikora aho babanje gusesengura umukino ubanza,ndetse anavuga ko n’ubwo Umutoza McKinstry atari mu Rwanda ariko bafatanya gutegura uyu mukino.

Mashami yagize ati “Twagerageje kuyobora umukino neza ndetse tunabona amahirwe menshi kurusha Abagande,kandi n’ibitego badutsinze urebye n’ibyo twabihereye, ubu icyo turi gukora ni ugusesengura amakosa twakoze kugira ngo tuzayakosore mu mukino utaha”

Umutoza Mashami kandi yakomeje agira ati”Umutoza turakorana umunsi ku wundi,turandikirana,nyuma y’imyitozo turaganira ndetse yanajyanye amashusho y’umukino ubanza ngo abashe kuwusesengura kandi mu by’ukuri biragenda neza”

Ministiri w’Umuco na Siporo, Madamu Uwacu Julienne nawe yasuye abakinnyi  b’ikipe y’igihugu Amavubi y’abatarengeje imyaka 23 abaha  ubutumwa bw’icyizere kandi abibutsa ko bahagarariye Milioni 12 z’Abanyarwanda.

Minisitiri Uwacu yatanze ubu butumwa mumyitozo ya nyuma y’ikipe y’igihugu Amavubi y’abatarengeje imyaka 23 mbere yuko berekeza Uganda kuri uyu wa kane.Minisitiri yabwiye aba bakinnyi ko bagomba kwibuka ko bahagarariye Milioni zigera kuri 12 z’Abanyarwanda n’ubwo bo bagiye ari abakinnyi 18.

Madamu Uwacu Julienne yagize ati,”Muracyari bato ariko abenshi muri mwe mukinira ikipe nkuru y’igihugu nkuru, ntacyo mucyeneye mutabonye, niyo mpamvu mugomba kwibuka ko n’ubwo muri 18 ariko muhagarariye abanyarwanda bagera kuri Milioni 12,”

Mu mukino ubanza ikipe y’igihugu ya Uganda y’abatarengeje imyaka 23 yari yatsinze iy’u Rwanda ibitego 2-1. Muri uyu mukino wo kwishyura, u Rwanda rukeneye ibitego 2-0 kugirango rubone tike y’icyiciro cya gatatu cy’aya majonjora.

Iyi kipe y’igihugu y’u Rwanda bikaba biteganijwe ko ihaguruka mu Rwanda kuri uyu wa kane ku isaha ya Saa munani z’amanywa yerekeza muri Uganda gukina umukino wo kwishyura uteganijwe kuri uyu wa Gatandatu taliki ya 30/05/2015 kuri Nakivubo Stadium
Tanga igitekerezo na Facebook

Tanga igitekerezo