Amavubi U-23 yanganyije na Somalia 1-1

Mu mukino wo kwishyura mu irushanwa ry’abatarengeje imyaka 23, Ikipe y’igihugu Amavubi, yaraye inganyije n’iya Somalia 1-1, gusa u Rwanda rwari rwatsinze umukino ubanza i Kigali 2-0 ruzakina umukino ukurikiraho na Uganda U-23.

Uyu mukino w’u Rwanda na Somalia wari uteganyijwe kubera mu gihugu cya Kenya  ariko biza guhinduka kuko Kenya yagaragaje impamvu z’umutekanomaze umukino  ukinirwa mu gihugu cya Djibouti kuri stade yitwa El Hadj Hassan Gouled.

U Rwanda rwafunguye amazamu binyuze ku mukinnyi rutahizamu Isaie Songa ku munota wa kane w’umukino gusa umukinnyi wa Somalia ukina ku ruhande mu bataha izamu, Abbas Mohammed yaje kwishyura icyo gitego.

Bonfils-Kabanda1

U Rwanda ruzakina na Uganda mu cyiciro gikurikira, ikipe izatsinda izahura na Misiri mu cyiciro cya nyuma cyo guhatanira itike yerekeza mu gikombe cya CAF U-23 kizabera muri Senegal kuva tariki ya 5-19 Ukuboza 2015, aho irushanwa rizitabirwa n’ibihugu umunani.

Umukino ubanza ushobora kuzabera mu Rwanda uwo kwishyura ukazabera muri Uganda, gusa ngo ishyirahamwe ry’umupira w’amaguru muri icyo gihugu FUFA ntiriragena aho uzabera.

Amakipe atatu ya mbere muri iri rushanwa azabona itike yo kujya gukina imikino ya Olympic mu mujyi wa Rio de Janeiro mu gihugu cya Brezil mu mwaka utaha wa 2016.

Ikipe y’igihugu ya Uganda ubu yatangiye imyitozo, abakinnyi 44 bahamagawe, bari mu myitozo ku kibuga cya KCCA.

Amavubi U-23 igizwe na:

Mu barinda izamu: Olivier Kwizera na Marcel Nzarora.

Ba myugariro: Abdul Rwatubyaye, Emery Bayisenge, Faustin Usengimana, Janvier Mutijima na Michel Rusheshangoga.

Abakina hagati: Djihad Bizimana, Yannick Mukunzi, Kabanda Bonfils, Kevin Muhire na Yves Rubasha.

Abasatira izamu: Justin Mico, Dominique Savio Nshuti, Jean Marie Muvandimwe, Isaie Songa, Bertrand Iradukunda na Bienvenue Mugenzi.

Tanga igitekerezo na Facebook

Tanga igitekerezo