Amavubi : Mashami na Higiro bagizwe abatoza bungirije Antoine Hey

Yanditswe na Admin ku wa 30.03.2017 saa 19:38 | Yasuwe : 23
Mashami Vincent na Higiro Thomas bahawe akazi ko kuba abatoza bungirije Antoine Hey uheruka kugirwa umutoza w’Amavubi
Mashami Vincent usanzwe ari umutoza w’ikipe ya Bugesera FC azungiriza umutoza mukuru Antoine Hey mu gihe cy’umwaka umwe nk’uko amasezerano y’umutoza mukuru abivuga, kimwe na Thomas Higiro usanzwe ari umutoza w’abazamu mu ikipe ya AS Kigali.

Bimwe mu bitegereje abatoza bose, harimo guhesha u Rwanda itike y’imikino ya nyuma y’igikombe cya Afurika cya 2019 kizabera muri Cameroun, aho u Rwanda ruri kumwe na Ivory Coast, Guinea, na Centrafrique mu itsinda H ry’amajonjora.

Umutoza mukuru, Antoine Hey yanasabwe guhesha u Rwanda itike y’imikino ya nyuma y’igikombe cya Afurika gihuza abakinnyi bakina imbere mu bihugu byayo (CHAN 2018) irushanwa rizabera muri Kenya mu ntangiriro z’umwaka utaha, aho u Rwanda ku ikubitiro ruzakina na Tanzania muri Nyakanga mbere yo gukina ijonjora rya nyuma.

Tanga igitekerezo na Facebook

Tanga igitekerezo