Amavubi arakina umukino wa gishuti n’Afurika y’epfo

Yanditswe na Admin ku wa 28.07.2015 saa 12:28 | Yasuwe : 822

Ikipe y’igihugu Amavubi yaraye igeze muri Afurika y’epfo amahoro aho ije gukina umukino mpuzamahanga wa gicuti n’ikipe y’abatarengeje imyaka 23, mu mukino uza gukinwa kuri uyu wa kabiri.

Ikipe y’u Rwanda igizwe n’abasore bakina muri shampiyona mu makipe yo mu Rwanda, kandi uyu mukino ugamije kubategura mbere y’uko U Rwanda rwakira irushanwa rya CHAN riza umwaka utaha.

Ikipe iyobowe n’umutoza Johnathan Brian McKinstry icumbikiwe kuri Protea Hotel mu mujyi wa Roodeport.

Umukino uri buhuze Amavubi na Afurika y’epfo y’abaterengeje imyaka 23 uraba saa 19:00 ku isaha y’I Kigali. Usibye ubukonje buri muri iki gihugu buza kugora aba basore, ahandi abakinnyi bose bahagaze neza kandi bafite icyizere cyo kwitwara neza, bagatsinda uyu mukino.

amavsa15

Ku mutoza McKinstry, araza kuba akoresha uyu mukino mu rwego rwo gukomeza kwitegura imikino ya CHAN ndetse n’umukino wa Ghana, aho ndetse kandi uyu mukino uzaba ufasha abakinnyi bashya kumenyera.

McKinstry ati, “Uyu ni umukino wo gusuzuma bamwe mu bakinnyi mfite. Bagomba gukora cyane bakanyigaragariza.Gusa mfite icyizere ko baza kubyitwaramo neza nkurikije uburyo bakoze imyitozo,”

Biteganyijwe ko nyuma y’uyu mukino, Amavubi azerekeza muri Ecosse ku itariki 2 Kanama, mu mwiherero uzamara ibyumweru bibiri aho Amavubi azakina imikino ya gicuti igera kuri itatu n’amakipe yo mu cyiciro cya mbere muri icyo gihugu.

Urugendo mu mafoto :

Tanga igitekerezo na Facebook

Tanga igitekerezo