Amasezerano yo gutangaza imikino ya shampiyona ntiyasinywe

Umuhango w’isinywa ry’amasezerano hagati ya televisiyo Tele 10 n’ishyirahamwe ry’umupira w’amaguru mu Rwanda kugura uburenganzira bwo gutangaza imikino ya shampiyona y’icyiciro cya mbere wagombaga kubera mu cyumba cy’inama cya Minisiteri ya Siporo n’umuco kuri uyu wa gatatu wasubitswe.

Aya masezerano atashoboye gushyirwaho umukono akaba yari ayo gutangaza imipira yose y’icyiciro cya mbere, isoko ryari ryarahawe ikigo cy’itumanaho cya Tele 10 kigizwe na  TV 10 na Radio 10.

Isubikwa ry’isinywa ry’aya masezerano ryaturutse cyane cyane ku mpungenge zagaragajwe  n’abanyamakuru benshi bari bitabiriye uyu muhango ndetse n’abayobozi b’ibigo by’itangazamakuru batiyumvishaga ukuntu Ishyirahamwe ry’umupira w’amaguru mu Rwanda ribatumira  mu muhango wo gusinya ayo masezerano kandi ubwaryo ryari ryababwiye ko uyu munsi bagombaga gutangarizwa igihe  ubwo burenganzira buzashyirirwa ku isoko bugahatanirwa n’ibigo bitandukanye bikorera mu Rwanda ndetse no hanze.

ferwafatele10

Icyo kibazo cyazamuwe n’umunyamakuru Niyifasha Didace ukorera radiyo Inkoramutima weruye abwira Minisitiri wa siporo n’umuco  ko uburyo ayo masezerano bugiye gusinywamo budaciye mu mucyo.

Iby yabishingiraga ngo kukomu inama baherukamo na Ferwafa ya batangarije ko  bazamenyeshwa ibiciro by’uko imipira izagurwa, bityo uwaba ushaka kuyigura akaba yapiganwa .

Didace Niyifasha yabitangaje muri aya magambo : ” Ubu rero ntabwo byumvikana uburyo dutumirwa mu muhango wo gusinya amasezerano, mu gihe twari dutegereje ko iryo soko rizatangwa tukarihatanira.”

Ibi byatumye n’ibindi bitangazamakuru birimo Lemigo TV, RBA  ariyo Radiyo na Televiziyo by’igihugu na byo bihita byerekanye ko bitumva ukuntu  Tele 10 ari yo yahawe uburenganzira bwo kugura no gutangaza no gucuruza imikino ya shampiyona nta piganwa ribayeho.

Minsitiri wa Siporo n’umuco Habineza Joseph wari witabiriye iyo mihango nawe ntiyajuyaje yahise asaba ko ayo masezerano atashyirwaho umukono mu gihe ahita atanga igihe kingana n’icyumweru kugira ngo undi wese waba abishaka kandi abifitiye ubuyobozi yagerageza amahirwe ye. Yatangaje ko bitarenze ku wa gatatu w’icyumweru gitaha aribwo abayobozi b’ibitangazamakuru mu Rwanda bifuza kugura uyu mupirababa batangake ibiciro byabo.

Igisabwa ibitangazamakuru byifuza kugura uyu mupira, ni ukuwugeza ku banyarwanda igihe uri kuba imbonankubone kuri TV, ukanaca kuri radiyo mu buryo bwa live igihe uri kuba.

Joseph Habineza ati: ” Igihe cyose wagura umupira ntubashe kuwugeza ku banyarwanda hose mu gihugu mu buryo bwa live, amasezerano nzasaba ko aseswa, kuko umupira ni uw’abanyarwanda, bagomba kuwukurikirana.”

Tanga igitekerezo na Facebook

Tanga igitekerezo