Amarushanwa y’abatarengeje imyaka 15 yatangijwe

Yanditswe na Rwanda Football ku wa 16.02.2015 saa 22:55 | Yasuwe : 1,152

Atangiza amarushanwa y’abatarengeje imyaka 15 mu karere ka Nyanza, Ministiri w’Umuco na Siporo, Ambasaderi Joseph Habineza yavuze ko u Rwanda rugomba kujya mu gikombe cy’Afurika cya 2019 kizabera muri Cameroun.

Kugirango ibi bigerweho, abana beza barimo gukina muri aya marushanwa ya U15 bagomba gutoranywa, bagashirwa hamwe ku buryo uyu mwaka urangira habayeho ikipe y’igihugu y’abatarengeje imyaka 15 igatangira gutegurwa.

“Nta mpamvu tuzitwaza yo kutajya mu gikombe cy’Afurika cya 2019 kuko aba bana bakurikiranywe, mugakuramo abeze bazagira ikipe y’igihugu y’igihugu ya U15, abo bagakurikinwa, nakizatubuza kugera kuri iyi ntego,”

“Iyi kipe ya U15 igomba kubaho mbere y’uko uyu mwaka urangira kuburyo abo bana bazaba batoranyijwe bategurwa, bagahabwa imikino myinshi. Bashoboye gutegurwa, bakazavangwa n’abakinnyi bakiri bato bari mu ikipe nkuru y’igihugu, mu myaka ine tuzaba dufite ikipe nziza y’igihugu igomba kwerekeza mu gikombe cy’Afurika cya 2019,”

“Tugomba gushaka abafatanya bikorwa kugirango iyi kipe ishobore kujya hanze, ikine imikino ya gicuti mu bihugu bya Sweden na Denmark kugirango barusheho kumenyerana,”

“Iki gikorwa gikomba guhoraho buri mwaka kandi ababyeyi namwe mukabigiramo uruhare, mugakurikirana aba bana kugirango bagera ku ntego bifuza,”

Uhagarariye FIFA akaba ashinzwe iterambere muri Afurika yo hagati, Seidou Mbombo Njoya we yavuze ko,”Niba mushaka ko u Rwanda rujya mu gikombe cy’Afurika cya 2019, iyi gahunda igomba kubahirizwa kandi igakurikiranwa neza kuko uyu niwo muyoboro wonyine uzabafasha kugera ku byo mwifuza.Ndifuza kuzabona ba Yaya Toure, Samuel Eto’O muri aba bana mu minsi iri imbere.”

Umuyobozi wa Ferwafa, Vincent Nzamwita yashimiye leta y’u Rwanda na FIFA ku nkunga bakomeje guha Ferwafa mw’iterambere ry’umupira w’amaguru.

Nzamwita yongeyeho asaba ababyeyi kuba hafi aba bana kugirango intego y’aya marushanwa bashobore kuyigeraho.”Turifuza kubona abana beza bazagira ikipe y’igihugu y’abaterengeje imyaka 15 nyuma yaburi biruhuko. Aba bana bagomba kuba hamwe bagatozwa kugirango mu myaka ine tuzabe dufite ikipe y’igihugu nkuru ikomeye ishobora kutujyana mu gikombe cy’Afurika.”

u15nyanza

Mu mikino yabaye uyu munsi mu karere ka Nyanza, amakipe 11 y’abahungu arimo Youvia, United Stars, Gihisi, Mugandamure, Gatagara, Ruhango, Olympafrica, Imbaraga, Nyanzan na Nyamure niyo azitabira aya marushanwa.

Naho mu bakobwa, amakipe atatu gusa agizwe na Youvia, United Stars na Nyanza niyo yonyine yiyandikishije gukina muri aya marushanwa.

Mu makipe 73 azitabira iki gikorwa mu ntara zigize igihugu, 53 ni ay’abahungu naho 21 ni ay’abakobwa batarengeje imyaka 15.

Nyuma ya Gatsibo na Nyanza itangizwa ry’aya marushanwa rizakomereza mu karere ka Rubavu tariki ya 21/02/2015 hanyuma asorezwe mu karere ka Kicukiro tariki ya 22/02/2015.

Kuva mu kwezi kwa gatandatu uyu mwaka, aya marushanwa azakomereza mu turere twa Nyarugenge, Musanze, Nyamagabe na Kayonza mu cyiciro cyayo cya kabiri.

Kuva mu kwezi kwa cumi kugeza mu kwa cumi n’abiri, aya marushanwa azakinwa mu turere twa Gasabo, Nyabihu, Rusizi na Rwamagana. Kuva mu kwa kabiri kugeza mu kwa kane umwaka utaha, aya marushanwa azakomereza Gicumbi, Rulindo, Huye na Nyagatare.

Uko imikino ifungura aya marushanwa mu turere izakinwa mu cyiciro cya mbere (phase 1)

Rubavu 21/02/2015
Abahunga Jua Toto vs Nyakiriba
Abakobwa Nyakiriba vs White Stars

Kicukiro 22/02/2015
Abahungu Gatenga vs Miroplastic
Abakobwa Masaka vs Nyarugunga

Tanga igitekerezo na Facebook

Tanga igitekerezo