Ally Bizimungu uvuye muri Kiyovu niwe uzatoza Bugesera.

Yanditswe na Admin ku wa 30.07.2015 saa 06:33 | Yasuwe : 1,187

Umutoza Ally Bizimungu watozaga ikipe ya Kiyovu Sports yamaze kwerekeza muri Bugesera FC aho yasinye amasezerano y’ umwaka umwe.

Umuyobozi w’ikipe ya Bugesera FC, Rutayisire Michel Jackson atangaza ko Ally Bizimungu agiye kuba umutoza wabo mu gihe cy’umwaka umwe uri imbere muri shampiyona ya 2015-2016 mu cyiciro cya mbere.

Michel atangaza ko amasezerano y’uwo mutoza agomba gutangirana na tariki ya 1 Kanama 2015. Yagize ati “icyo twavuganye nawe nuko azagerageza ikipe ikaza mu makipe byibuza ane cyangwa atanu ya mbere muri shampiyona, bizaterwa n’ubushobozi izaba ifite nawe n’ibyo azifuza nibiboneka,tuzakora ibishoboka byose kugira ngo dushobore gushakisha icyatuma bigenda neza”.

ally-bizimungu

Uyu muyobozi avuga ko umutoza yasabye ubuyobozi bw’ikipe kumuhemba neza, kumufasha gushaka ibikoresho no kumuha abakinnyi beza bashoboye bakiyongera ku bo bari basanganywe bakagira ikipe ifatika.

Ally agiye kungirizwa n’abatoza babiri bari basanzwe muri iyo kipe ari bo, Noel Nsaziyinka na Kayitare Aime kimwe n’umutoza w’abazamu Moussa Haule ukomoka muri Tanzania. Ally Bizimungu yinjiye muri Kiyovu mu ntangiriro za shampiyona ya 2014-2015. Bizimungu yatoje amakipe atandukanye arimo Kiyovu Sports, As Muhanga, Rayon Sports, Mukura Victory Sports n’izindi.

Ikipe ya Bugesera yageze muri shampiyona y’icyiciro cya mbere uyu mwaka nyuma yo kuva mu cya kabiri. Bugesera FC yageze mu cyiciro cya mbere yegukanye igikombe cy’icyiciro cya kabiri itsinze Rwamagana City ibitego 2-0 ku mukino wa nyuma

Tanga igitekerezo na Facebook

Tanga igitekerezo