Al Ahly yatsindiye APR FC 2-0 i Kigali muri CAF champions league

Yanditswe na Admin ku wa 15.03.2015 saa 12:51 | Yasuwe : 678

Ikipe ihagarariye u Rwanda mu gikombe cy’Afurika cy’amakipe yatwaye igikombe cya shampiyona (Champion’s league)yatsindiwe ku kibuga cyayo i Kigali na Al Ahky yo mu misiri 2-0

Nubwo igice cya mbere cyarangiye APR FC iyoboye umukino, mu cya kabiri, Al Ahly ikipe yatwaye ibikombe umunani bya champions league yihariye umukino itsinda ibitego bibiri, icyizere cyo gukomeza kirayoyoka mu gihe umukino wo kwishyura uzabera i Cairo tariki ya 4 Mata 2015.

Mu gice cya kabiri, ku munota wa 58, APR FC yabonye uburyo bwagombaga kuvamo igitego, ku mupira bambuye abakinnyi ba Al Ahly, Ndahinduka Michel awinjirana mu rubuga rw’iyi kipe ari kumwe na myugariro na Mubumbyi Barnabe, ariharira ataye mu izamu ufatwa neza n’umunyezamu Sherif Ekramy.

APR FC yashakaga intsinzi mu rugo mbere yo kujya mu Misiri, yinjijemo Butera Andrew asimbura Iradukunda Bertrand ibintu bitashimishije abakunzi bayo naho Al Ahly ikuramo Maamen Zakaria hinjiramo Mohmoud Ahmed bongera ubusatirizi.

Nyuma y’iminota irindwi, Emad Mohamed yatsindiye Al Ahly igitego cya mbere ku mupira yakiriye hafi y’urubuga rwa APR FC ateye ishoti rikubita umutambiko w’izamu winjiramo.

alahlyapr
Mu myaka 17 ishize, Al Ahly yari yaratsindiwe mu Rwanda igitego 1-0 yakinnye na Rayon Sports, yokeje igitutu ba myugariro ba APR FC aho ku munota wa 68, Bayisenge agarura umupira ukomeye mu rubuga rwabo.APR FC yashoboraga kugombora iki gitego ku munota wa 71 ariko umupira Rusheshangoga Michel yageranye mu rubuga rwa Al Ahly awuteye wambukiranya urubuga rwa Al Ahly.

Iranzi Jean Claude wari watwaye APR FC mu gice cya mbere yasimbuwe na Sibomana Patrick ku munota wa 80.Ku munota wa 83, Waleed Suleyman yatsinze igitego cya kabiri cya Al Ahly nyuma yo guhererekanya umupira kuva mu kibuga hagati.Nyamara igice cya mbere, APR FC yari imbere y’abakunzi bayo yari yayoboye umukino.

Bigirimana Issa yasohotse mu kibuga ku munota wa 40 avunitse asimburwa na Mubumbyi Bernabe mu gihe bagenzi bavugaga ko yakoreweho penaliti. Mugiraneza Jean Baptiste yahawe ikarita y’umuhondo mu gice cya mbere yuzuza amakarita abiri nyuma y’iyo yahawe atsinze igitego Liga Muculmana de Maputo agakuramo umupira yari yambaye, ntazagaragara ku mukino wo kwishyura.

Umukino wo kwishyura mu Misiri uzakinwa tariki ya 4 Mata 2015, APR FC isabwa gutsinda ibitego bitatu ku busa.

Abakinnyi babanjemo :

APR FC: Kwizera Olivier, Nshutiyamagara Ismael, Rusheshangoga Michel, Ngabonziza Albert, Bayisenge Emery, Mugiraneza Jean Baptiste, Mukunzi Yannick, Mugiraneza Jean Baptiste, Iradukunda Jean Bertrand, Iranzi Jean Claude, Ndahinduka Michel na Bigirimana Issa

Al Ahly: Sherif Ekramy, Basem Ali, Saadeldin Samir, Mohamed Naguib, Hessein Sayed, Housam Mohamed, Hossam Ghaly, Abdalla Mohmoud, Maamen Zakaria, Ebimobowei Peter na Emad Mohamed.

Tanga igitekerezo na Facebook

Tanga igitekerezo