Akarere ka Huye ntigashima umusaruro wa Mukura VS

Yanditswe na Admin ku wa 06.03.2015 saa 16:24 | Yasuwe : 870

Ubuyobozi bw’Akarere ka Huye busanga Mukura Victory Sport itaragize umusaruro mwiza muri uyu mwaka ahanini biturutse kudakinira imbere y’abafana bayo no kuba yari ikipe nshya.

Akarere ka Huye ni umuterankunga mukuru wa Mukura VS aho gatanga miliyoni 60 buri mwaka mu gufasha iyi kipe. kakunganirwa na Sosiyete itwara abagenzi mu Ntara y’Amajyepfo Volcano Express n’uruganda rw’amazi rwa Huye.

Ubuyobozi bw’Akarere busobanura ko gutanga aya mafaranga ari mu rwego rwo gufasha abatuye akarere gususuruka no gusabana bikabafasha mu kwesa imihigo igamije iterambere  baba bihaye kugeraho.Muri iyi shampiyona ya ya 2014/2015, ibi byishimo byarabuze ku bakunzi ba Mukura VS.Iyi kipe iri ku mwanya wa 11 mu makipe 14 n’amanota 16.

muzuka

Kayiranga Muzuka Eugène, umuyobozi w’Akarere ka Huye, mu kiganiro cyihariye n’urubuga rwa Mukura VS  yashimangiye ko Mukura Victory Sport izatungurana mu minsi ya nyuma, anasobanura ko hari impamvu zo kubura umusaruro muri uyu mwaka. Agira ati : ” Mukura VS iri mu makipe ya nyuma , ntabwo tubyishimiye nk’akarere gafasha iyi kipe ariko ntiyitware neza. Twizera ko izatsinda kuko hari ubwo itungura abantu nyuma, ni ibintu tumenyereye”

Zimwe mu mpamvu uyu muyobozi agaragaza z’umusaruro muke harimo kuba Mukura VS yarakiriraga imikino yayo i Muhanga n’i Kigali, kure y’abafana bayo biturutse ku kuvugurura Sitade ya Huye ariko akabizeza ko shampiyona itaha bazayirebera i Huye. Akomeza agira ati :”Abatuye Huye baba bifuza kuyifanira hafi. Kujya i Muhanga n’i Kigali ntabwo bidushimisha, n’abafana ntibabashe gutiza umurindi abakinnyi ari benshi. Kuba tudakinira mu rugo hari icyo bihindura. Abantu dushonje duhishiwe kuko ikibuga cyamaze kuzura ku buryo umwaka utaha tuzahakinira.”Muzuka avuga ko n’ikibazo cy’abanyamahanga cyagonze iyi kipe. Agashimangira ko aba bashya bagomba kugia umwanya wo kumenyerana mu gihe bari mu ikipe idafite ibibazo mu buyobozi bwa yo.

sitade_huye

Sitade ya Huye ifite ubushobozi bwo kwakira abantu ibihumbi 11, izaba ari iya kabiri nini mu Rwanda nyuma ya Sitade Amahoro yakira ibihumbi 25 bicaye neza, izura itwaye miliyari 7 z’amafaranga y’u Rwanda.

Imirimo yo kuyitunganya yari mu byiciro bitatu : icya mbere ari ugutunganya ikibuga bashyiramo ubwatsi bw’ubukorano (Tapis Synthetique) no kuzamura inyubako za sitade ; icya kabiri kirimo gusiga amarangi, gutunganya ibyumba by’abakinnyi, abaganga n’abanyamakuru(Vestiare) no gushyira amazi n’amashanyarazi mu byumba imbere. Ibi byose byamaze gukorwa. Hasigaye icyiciro cya gatatu kizibanda mu gutunganya parikingi y’imodoka, gushyiramo amatara amurika n’ijoro na televisiyo yo ku kibuga.

Tanga igitekerezo na Facebook

One thought on “Akarere ka Huye ntigashima umusaruro wa Mukura VS

Tanga igitekerezo