Airtel yatangije amarushanwa y’abana batarenge imyaka 17

Yanditswe na Admin ku wa 13.06.2015 saa 23:19 | Yasuwe : 870

Airtel Rwanda yatangije Airtel Rising Stars, irushanwa ry’umupira w’amaguru rihuza abana batarengeje imyaka 17, rizakinirwa mu gihugu hose rigamije guteza imbere impano zabo.

Irushanwa ryatangirijwe i Rwamagana kuwa 13 Kamena 2015 ryitabirwa n’abayobozi batandukanye, barimo abahagarariye ishyirahamwe ry’umupira w’amaguru mu Rwanda FERWAFA, abayobozi ba Airtel Rwanda na Jimmy Mulisa wamamaye mu ikipe ya APR FC ndetse no mu ikipe y’igihugu Amavubi ndetse akaba umwe mu bigeze kuba ababigize umwuga ku mugabane w’u Burayi.

Umuyobozi wa Airtel Rwanda, Teddy Bhullar, yavuze ko bategura aya marushanwa bagamije gufasha abana kugera ku nzozi zabo z’ubuzima baba bafite.

??????????Teddy Bhullar, Umuyobozi wa Airtel Rwanda, Jimmy Mulisa (wambaye umutuku) na Rutsindura Antoine uzwi nka Mabombe

Yagize ati “Intego yacu nka sosiyete n’ugufasha abana kubyaza umusaruro impano zabo bakagera ku byo bifuza bagakinira ikipe y’igihugu n’andi makipe atandukanye ku mugabane ndetse no ku Isi hose.’’

Yakomeje ashima ishyirahamwe ry’umupira w’amaguru mu Rwanda FERWAFA ku bufatanye rikomeje kugaragaza mu gufasha abana kuzamura impano zabo.

Umuyobozi ushinzwe tekiniki muri FERWAFA Antoine Rutsindura, wari uhagarariye Perezida wayo, yashimiye Aitel Rwanda ku gikorwa cyiza gifasha abana kuzamura impano zabo aho mu myaka ibiri ishize amarushanwa aba hari umusaruro ufatika wagezweho.

Uyu mwaka amakipe 64 ni yo azitabira irushanwa rya Aitel Rising Stars, 48 y’abahungu na 16 y’abakobwa aho bazazenguruka igihugu cyose, ushinzwe gutoranya abakinnyi muri FERWAFA akazitabira imikino yose atoranyamo abitwaye neza bagashyirwa mu ikipe y’igihugu.

Aitel Rwanda itegura amarushanwa ya Rising Stars buri mwaka, iyi ikaba ari inshuro ya gatatu aho abana bagira amahirwe yo kugaragaza impano zabo.

Mu mikino yabaye hatangizwa iri rushanwa mu bakobwa Airtel Selection FC yatsinze Nyagatare FC kimwe ku busa, mu bahungu Rubona FC yatsinze Airtel Selection FC kimwe ku busa, izatsinze zikaba zahawe igikombe.

Tanga igitekerezo na Facebook

Tanga igitekerezo