Abouba na Makenzi bavuye muri Kenya kumvikana na Gor Mahia FC

Yanditswe na Rwanda Football ku wa 10.12.2014 saa 21:02 | Yasuwe : 1,012

Abakinnyi ba Rayon Sports Nizigiyimana Abdul Karim” Makenzi” na Sibomana Abouba bavuye muri Kenya kuvugana n’ikipe ya Gor Mahia yababengutse mu mikino ya CECAFA Kagame Cup 2014 yabereye i Kigali muri Kanama 2014.

Abouba na Makenzi ntibakinnye irushanwa ry’umuvunyi ryabaye mu mpera z’icyumweru gishize. Ubuyobozi bwa Rayon Sports bwemeza ko bamaze icyumweru barataye akazi. Ku wa mbere taliki 07 Ukuboza 2014 nimugoroba ni bwo bageze i Kigali bavuye muri Kenya.

abubamakenzi
Sibomana Abouba yavuze ko bumvikanye na Gor Mahia kuzayikinira mu kwezi kwa mbere hasigaye ko yumvikana na Rayon Sports .Yagize ati ” Twababwiye ko tugifitiye amasezerano y’umwaka muri Rayon Sports, tubasaba kuvugana nayo. Twumvikanye na Gor Mahia ku ruhande rwacu , igisigaye ni uko bavugana na Rayon Sports nejo bikunze tukabona impapuro twahita tugenda”. Gor Mahia izatangira imyitozo ku ya 05 Mutarama 2015 yitegura shampiyona ya Kenya . Kuri ubu abakinnyi n’umutoza bari mu kiruhuko.

Abouba avuga ko bazasinya imyaka 2, ubu hasigaye ko Rayon Sports ibaha amabaruwa abarekura nyuma ya Noheli bakerekeza muri Kenya gutangira imyitozo.

Rayon Sports yabasabye kwisobanura

Ubuyobozi bwa Rayon Sports buvuga ko bwandikiye aba bakinnyi bubasaba ibisobanuro by’aho bari baragiye. Niyomusabe Emmanuel, umuvugizi wa Rayon Sports, avuga ko bazafata umwanzuro w’ibihano nyuma yo kumva ibisobanuro bahabwa nabo. Niyomusabe avuga ko atazi iby’uko Makenzi na Abouba bagiye muri Kenya.

Yagize ati “ Baragiyeyo baba barabikoze mu buryo bunyuranyije n’amategeko. Umukinnyi utwatse uburenganzira bwo kuvugana n’indi ikipe turabumuha mu gihe iyo kipe yatwandikiye ibidusaba. Ibyo kugenda batabivuze turumva ibisobanuro baduha , tubone gufata umwanzuro”.

Niyomusabe avuga ko biteguye kurekura abakinnyi mu gihe Gor Mahia yabaha ibyo bifuza. Niyomusabe yagize ati ” Isi y’imikino irafunguye, iyo umukinnyi ashaka kugenda abantu barabiganira hakarebwa ibisabwa n’ ibyo ikipe yatanga. Iyo ingingo zose zumvikanyweho umuntu aragenda, byakanga akahaguma”.
Gor Mahia yegukanye igikombe cya 14 cya Shampiyona muri uyu mwaka, Kuri ubu ikomeje kwiyubaka nyuma yo gutakaza rutahizamu Dan Serunkuma werekeje muri Simba na Geoffey Baba Kizito warangije amasezerano.

Tanga igitekerezo na Facebook

Tanga igitekerezo