Abayobozi b’amakipe ntibishimiye icyemezo cya Ferwafa

Yanditswe na Admin ku wa 12.12.2014 saa 08:29 | Yasuwe : 628

Kuva shampiyona y’umupira w’amaguru mu Rwanda y’uyu mwaka w’imikino 2014/2015 yatangira, buri kipe yo mu cyiciro cya mbere yategetswe kwikodeshereza imbangukiragutabara (Ambulance), kugira ngo zijye zitwara abakinnyi bagiriye ibibazo byo gukomereka mu kibuga, ariko iki cyemezo nticyakiriwe neza.

Umuvugizi w’ishyirahamwe ry’umupira w’amaguru mu Rwanda, avuga ko igiciro cy’izo mbangukiragutabara atari FERWAFA yakigennye, yemwe n’amafaranga yo kuzikodesha atangwa n’amakipe ahabwa Croix Rouge izana izo mbangukiragutabara adahabwa FERWAFA.

Hakizimana Musa yagize ati “amakipe yose yakiriye imikino mu mujyi wa Kigali, asabwa amafranga ibihumbi ijana na makumyabiri (120.000frw) yo gukodesha imbangukiragutabara ndetse ku kibuga bagahabwa n’abantu bo kwita ku bashobora kuvuninikira mu kibuga n’imiti yo kubitaho, naho amakipe yakiriye mu ntara yo asabwa gutanga amafranga ibihumbi mirongo itandatu (60.000frw), akagenerwa abantu bo kwita ku bakinnyi bashobora kuvunikira mu kibuga hamwe n’imiti, ariko akikodeshereza imbangukiragutabara ndetse ntitunabategeka n’aho bazikura n’iyo bazibonera ubuntu kuri twe nta kibazo.”

ambulance                                                 Ambulance kuri Sitade Amahoro (Ifoto/Izuba Rirashe/Ngendahimana S)

Bamwe mu bayobozi b’amakipe baganiriye n’iki kinyamakuru bavuze ko izi mbangukiragutabara zibahenda. Kayumba Jean Pierre, perezida wa Kiyovu sports yagize ati “twe hari igihe dukina n’ikipe yoroshye, n’ayo mafranga 120.000 ntitube twayabona, bitewe n’abafana baba binjiye ku kibuga, urumva rero ntabwo tuba twunguka ahubwo tuba duhomba kuko tuba tugomba no kwishyura ikibuga n’abakitaho, ku bwanjye mbona ariya mafranga ari menshi.”

Muramira Gregoire; perezida w’ikipe y’Isonga, nawe avuga ko amafranga batanga ku mbangukiragutabara nta na rimwe bayagaruza, kereka iyo bakinnye n’amakipe akomeye nka Rayon sports, APR na Kiyovu.Muramira avuga ko icyifuzo cy’abayobozi b’amakipe ari uko izo mbangukiragutabara zajya zishyuzwa ari uko zakoreshejwe ku kibuga.

Hakizimana Musa avuga ko FERWAFA iri mu biganiro na Croix Rouge ngo barebe ko ibiciro byo gukodesha izi mbangukiragutabara byagabanuka, ndetse bizaba ibiciro bimwe haba mu Ntara no mu Mujyi wa Kigali.

Mu yandi makuru Musa avuga ko ari inshingano z’amakipe yakiriye gutegura ikibuga gikinirwaho, kuzana urubaho rwandikamwo nimero z’abakinnyi basimbura ndetse n’ibindi bikenerwa ku kibuga, kandi abazajya batabyubahiriza bazajya baterwa mpaga.

Tanga igitekerezo na Facebook

Tanga igitekerezo