Abaterengeje imyaka 15 : Amakipe yatangiye kwiyandikisha

Iri rushanwa ry’abatarengeje imyaka 15, rizategurwa n’ishyirahamwe ry’umupira w’amaguru mu Rwanda (FERWAFA) mu rwego rwo gushakisha abakinnyi bakiri bato benshi kandi bafite impano hagamijwe kuzatoranywamo abazigishwa umupira w’amaguru byisumbuyeho. Kuri uyu wa kabiri amakipe yatangiye kwiyandikisha.

Irushanwa rya U15 rizategurwa na Ferwafa biteganyijwe ko rizatangira muri Gashyantare nyuma y’uko abana bazaba barangije kwiyandikisha bitarenze italiki ya 2, Mutarama, 2015.

Abatekinisiye ba Ferwafa bafatanyije n’Ijabo Foundation bazagaragaza amakipe azaba yemerewe gukina iri rushanwa  ku tariki ya 09 Mutarama 2015 mbere y’uko bakora ingengabihe n’amategeko azagenga aya marushanwa.

Nubwo aya marushanwa ateganyijwe kuzamura umupira w’abana bakiri bato mu gihugu cyose, azafasha no kuzamura urwego rw’abasifuzi ndetse n’abatoza nk’uko Ferwafa ibitangaza.

u15

Aya marushanwa ya U15 azafasha guha umwanya wo gukina abana bakiri bato ndetse anazamure impano zabo by’ubakiye kundanga gaciro z’igihugu. Abahungu n’abakobwa bazitabira aya marushanwa bagomba kuba baravutse muri iyi myaka ikurikira;

U13: Bagomba kuba baravutse hagati ya Mutarama,  2002 n’Ukuboza 2003,
U15: Abakinnyi bagomba kuba baravutse hagati ya  Mutarama  2000 n’Ukuboza 2001,
U17: Abakinnyi bagomba kuba baravutse hagati ya Mutarama 1998 n’Ukuboza 1999.

Amarushanwa ya U15 azajya akinwa mu mezi icyenda mu mwaka mu gihugu hose. Buri mwaka wa shampiyona uzajya ukinwa mu mezi atatu guhera tariki ya 01, Gashyantare, 2015.

Buri League izaba igizwe n’amakipe 10. Mu ntangiriro, icyiciro cya mbere (Phase 1) kizabera mu turere tune tugize igihugu; Kicukiro (Central), Rubavu (Northwest), Nyanza (South) na Gatsibo (East) hanyuma gitangire kuba mu kwa kabiri kugeza muri Mata.

Icyiciro cya kabiri (Phase 2) kizaba kuva mu kwa gatandatu kugeza mu kwa munani kibere mu turere twa Nyarugenge (Central), Musanze (Northwest), Nyamagabe (South) na Kayonza (East).

Icyiciro cya gatatu (phase 3) kizaba kuva mu kwa cumi kugeza mu kwa cumi n’abiri, kibere mu turere twa Gatsibo (Central), Nyabihu (Northwest), Rusizi (South) na Rwamagana (East)

Icyiciro cya kane (Phase 4) cyo kizaba mu mwaka wa 2016 kuva mu kwezi kwa kabiri kugeza mu kwane kikazabera mu karere ka Gicumbi, (Central), Rulindo (Northwest), Huye (South) na Nyagatare (East).

Nyuma yo gukina ibi by’icyiciro byose, FERWAFA izatoranya abakinyi beza 30 kuva muri buri league bahurizwe hamwe bigishwa umupira w’amaguru n’inzobere mu gutoza umupira w’amaguru mu Rwanda.

Tanga igitekerezo na Facebook

Tanga igitekerezo