Abanyarwanda batatu bagiye mu kazi mu gikombe cy’Afurika

Yanditswe na Rwanda Football ku wa 06.01.2015 saa 20:47 | Yasuwe : 768

Abanyarwanda batatu Ntagungira Celestin , Ndagijimana Theogene na Nkubito Athanase berekeje mu gikombe cy’Afurika kigomba kubera muri Guinee Equatorial kuva tariki ya 17/01/2015 kugeza tariki ya 08/02/2015.

Ndagijimana usanzwe asifura ku ruhande, yatoranyijwe mu basifuzi 30 bazasifura imikino ya nyuma y’igikombe cy’Africa. Ndagijimana yaraye yerekeje i Bata muri Equatorial Guinea aho gukora ikizamini cya nyuma (Physical Test) giteganyijwe tariki ya 09/01/2015 mbere y’uko iyi mikino itangira.

Ndagijimana w’imyaka 36, ni inshuro ya mbere azaba agiye gusifura imikino ya nyuma y’igikombe cy’Africa. Mu mwaka wa 2014, Ndagijimana yasifuye irushanwa ry’igikombe cy’Afurika cya abakinnyi bakina ku mugabane wa Afurika (CHAN) cy’abereye muri Afurika Y’epfo, ari naho yagaragariye.

cafrwanda

Ndagijimana wabaye umusifuzi mpuzamahanga mu mwaka wa 2008 aje yiyongera kuri Ntagungira Celestin bakunda kwita Abega, ndetse na Kabanda Felecien, babashije gusifura mbere imikino y’igikombe cy’Africa, bakanagira akarusho ko basifuye imikino ya nyuma y’igikombe cy’isi.

Ntagungira wahoze ari umuyobozi wa FERWAFA, nawe yerekeje muri Guinee Equatorial nk’umwe mu bayobozi batanu bahagarariye abasifuzi mu turere dutana twa Afurika (Zonal Representative).

Abandi bahagarariye uturere twabo bazitabira igikombe cy’Afurika ni; El Arjoun Abdelrrahim (North/Algeria), Louis Okai-Mensah Lareya (Ghana), Ndiaye Birame (West/Senegal) na Muinjo Johannes (South/Namibia).

Undi munyarwanda Nkubito Athanase usanzwe ukora muri CAF nka Assistant Refereeing Manager. Nkubito wahoze ashinzwe ishami ry’Abasifuzi muri Ferwafa yatangiye iyi mirimo muri CAF mu ntangiriro z’umwaka ushize wa2014.

Tanga igitekerezo na Facebook

Tanga igitekerezo