Abakinnyi batanu ba Etincelles barashinjwa ruswa

Yanditswe na Admin ku wa 05.05.2015 saa 10:26 | Yasuwe : 799

Abakinnyi batanu b’ikipe ya Etincelles bakurikiranyweho kwakira ruswa kugira ngo bitsinditshe mu gushaka guha amahirwe ikipe ya Musanze FC. Izi zombi zirahatanira kuguma mu cyiciro cya mbere.

Myugariro wanakiniye amakipe yose akomeye mu Rwanda n’Amavubi igihe kinini Hategekimana BonaventureGangi, Pappy Chimanga, Bebeto Lwamba, Ilunga Freddy Mukadi umuzamu  na Pacifique Mugwaneza wahoze muri Gicumbi FC nawe ukina mu bugarira nibo bafunze.

Umutoza wa Etincelles yatangaje ko koko aba bakinnyi bafunze kuko ngo babasanganye amafaranga bahawe n’ikipe ya Musanze FC kugira ngo bajye bitsindisha imikino basigaranye maze bahe amahirwe Musanze ntizamanuke nk’uko ngo nawe abyumva.

etincelles15

Etincelles ubu iri ku mwanya wa 13 naho Musanze ni iya 12 mu makipe 14, iyo shampionat irangiye hamanuka amakipe abiri agasubira mu kiciro cya kabiri. Ubu Musanze FC irarusha Etincelles amanota 7.

Aba bakinnyi bamwe batawe muri yombi mbere gato y’umukino Etincelles iheruka gutsindwamo (1 – 0) na Police FC muri week end, abandi bafatwa nyuma yawo.Mu makipe ari inyuma ubu niho hamaze iminsi havugwa ruswa mu zishobora kumanuka. Mu minsi ishize havuzwe ibya ruswa hagati y’amakipe ya Mukura VS na Isonga FC.

Bivugwa ko Mukura yaba yarahaye ruswa umutoza w’Isonga FC kugira ngo yorohereze iyi kipe ibone amanota atatu atuma itajya mu kaga ko kuba yamanuka.Gusa ngo kuko uyu mutoza atabivuganye n’abakinnyi n’ubuyobozi ntibyashobotse ahubwo Isonga yanganyije na Mukura VS maze havuka umwuka mubi hagati y’abari bumvikanye.

Impande zombi ariko zikaba zarahakanye ko ibi byabayeho. Gusa umutoza Seninga Innocent w’Isonga yemeye ko Mukura yari yamwegereye ngo agire icyo ayifasha ku mukino bakinnye.

Ruswa yavuzwe kenshi mu mupira w’amaguru mu Rwanda ariko gacye cyane nibwo FERWAFA yagaragaje ubushake bwo kuyikurikirana no kuyihana. Kubura ibimenyetso nicyo gisubizo gitangwa.

Aba bakinnyi baje kurekurwa kuwa gatatu tariki 06 Gicurasi bakazakomeza gukurikiranwa bari hanze

 

Tanga igitekerezo na Facebook

Tanga igitekerezo